Minister Dangui Oduber a felicita Botica di Servicio cu nan certificacion di HKZ

The content originally appeared on: Diario

ORANJESTAD (AAN): Manera cu DIARIO a trece dilanti caba, Diabierna atardi Minister di Turismo y Salud Publico Sr. Dangui Oduber

tabata presente na e celebracion di certificacion di Botica di Servicio Eagle pa un momento special.

    Esaki ta debi cu Botica di Servicio ta bira e prome botica den e area di Caribe cu ta ricibi e certificacion di “Harmonisatie Kwaliteitsbeoordeling in de Zorgsector” (HKZ). E certificacion aki ta mehora e calidad di e farmacianan riba Aruba cual ta conduci na un mihor cuido cu ta ser duna na nos aseguradonan.

   E botica ta un instrumento hopi importante den salud publico ya cu despues di bay bo doctor ta e farmaceuticonan ta e punto di cuido na unda informacion ta worde duna pa cu medicina.

   E certificado di HKZ ta significa cu e botica ta worde reconoci a base di 3 pilar importante: (1) E botica tin su procesonan riba un nivel di bon calidad. (2) E botica tin su clientenan central. (3) E botica tin un proceso continuo di mehoracion di nan servicionan pa nan clientenan.

  Minister Oduber a remarca cu e pilarnan aki ta cuadra cu e vision y maneho di e ministerio di Salud Publico caminda ta enfoca pa e añanan nos dilanti ta pa mehora e calidad di cuido na Aruba door di inverti den tur aspecto cu ta ensera calidad caminda my en special e cliente/pashent ta central.

Cu e certificacion aki Botica di Servicio ta crea oportunidadnan tambe pa sigui inverti den desaroyonan di specialismo di nos apothekers den ramo di “Openbare apothekers”. Cual ta e siguiente paso di reconocimento den AruBIG segun e mandatario.

Minister Oduber a reconoce Botica di servicio pa tur su trabaonan cu el a haci durante un temporada hopi dificil. Sin mas Botica di Servicio a sa di sigui haci inversion den e calidad di cuido door di crea diferente proyectonan. Un di e proyectonan aki cu ta di sumo importancia ta e implementacion di seguridad di remedi por medio di intercambia informacionnan esencial entre boticanan. Esaki ta e seguransa na cada pashent cu nan medicinanan ta worde entrega den forma mas sigur y corecto.

Minister Oduber a gradici e gerente di Botica na Servicio y finalmente pa yama danki na henter e team di Botica Eagle, Minister Dangui Oduber a presenta nan cu un bunita plakaat. Pa homenahea e bunita logro di ta e prome Botica den Caribe cu e certificacion den HKZ.