Minister Angel Bermudez tampoco tin informacion di ferry cu lo cuminza bin for di Venezuela

admin

Minister Angel Bermudez tampoco tin informacion di ferry cu lo cuminza bin for di VenezuelaORANJESTAD(AAN): Den e dianan aki a sali den publicidad den fin di siman tocante un Ferry cu ta biniendo Aruba y ta core e ruta Aruba-Venezuela, treciendo carga, etc. Minister Angel Bermudez ta encarga cu Douane, etc. cu tin cu haci controlnan necesario y tin basta comentario den comunidad riba esaki.

E minister a splica cu tin basta tempo caba cu tin un proyecto di ferry ta worde analisa cu ta un proyecto di tres pais, Corsou, Aruba y Boneiro, y e minister a haya un rapport algun luna pasa, pero mas leu cu esey, e minister no a tende nada mas.

Tin di compronde cu nan tin e problema di logistica na Boneiro pa e ferry por para eynan. Aki na Aruba mester bin ainda, si kier realisa esaki, e palabracion entre e departamentonan cu ta concerni, cu ta polis, douane y imigracion, pa ora cu un barco asina ey yega cu pasahero y cu material y auto, cu eseynan cierto momento mester worde trata, mester worde procesa segun e leynan cu ta na vigor aki na Aruba.

Pa e minister e proyecto di ferry cu e conoce, tin cu bisa cu diabierna, ora cu a bishita waf di container na Barcadera, cierto momento tambe, a puntra si e ta na altura cu ta bay bin un Ferry di Venezuela. A desmenti esaki pasobra no tin e informacion di ningun ferry asina. A puntra na e director di Douane kende tabata presente si e tabata na altura.

Manera cu a remarca, Douane ta un di esnan cu tin cu worde envolvi den henter e preparacion y proceduranan pa ora cu un nave asina yega Aruba. E director no tin ningun informe of detaye y no ta na altura di un proyecto asina aki. Por ta den e dianan venidero, e minister lo por worde informa. Pero na e momentonan aki, e minister no tin ningun informacion.

E minister a agrega cu pa loke ta trata e departamentonan cu ta cay bao di dje, cual ta entre otro Douane, nan trabao, nan tarea legal ta cu na momento cu un nave yega aki of cierto linea aerea, cu nan tin cierto proceduranan cu tin cu cumpli cune y naturalmente, pa tur e personanan cu ta abordo cu kier bishita Aruba, tambe mercancia cu nan kier trece Aruba, tin e proceduranan di Douane cu nan mester worde someti na dje.

Na e momento ey cu lo bay bin un ferry of cualkier otro nave, ta asina cu e cuerpo douanero mester ta informa pasobra si esey ta bay bira algo regular, cu nos mester bay wak unda un ferry asina ey ta yega, kico ta e infrastructura necesario, kico ta e logisticanan cu tin cu worde prepara pa asina ey entre otro e cuerpo di douane por haci su trabao debidamente.

Un ferry en principio ta trece persona y e ta trece mercancia y tambe auto. Na e momento cu tin un plan asina ey y ta asumi cu ora cu ta bay establece un conexion maritimo asina ey, cu lo tin un business case traha cu esnan cu ta bay inici’e ta sigur cu e ta bay ta exitoso cu esey lo worde delibera di antemano cu e instancianan cu ta concerni, cu ta imigracion, polis y douane.

Manera cu e minister a confirma, te cu diabierna, director di douane no ta na altura di un proyecto asina aki, pero kisas den e dianan venidero lo worde informa, segun Angel Bermudez.

Tin cu wak kico ta exigencianan pa cierto momento por ricibi un nave asina ey y por haci uzo di e infrastructura cu tin presente. Unico cos cu tin cu haci ta cu e cuerpo di douane mester worde informa y mester wak con mester cierto momento tuma e preparacionnan pa nan por cumpli y nan por fungi eynan na momento un nave asina yega Aruba, e minister a conclui.

Next Post

Homber cu a scop Dama na su parti intimo a haya 80 ora di castigo

El a haya mokete y tambe herment contra barica! ORANJESTAD   (AAN): E homber I.T. a presenta den Corte pa e caso penal cu Ministerio Publico a cuminsa contra dje. Den sala di Corte tambe tabata presente e victima G., kende ta e acompañante di I.T.    MALTRATA DAMA:    E […]