Militar Hulandes a hoga na Curaçao ora di snorkel na lama

The content originally appeared on: Diario

Otro incidente di snorkel na mesun beach

WILLEMSTAD: Tabata Diasabra 24 di Februari 2024, cu un Militar Hulandes di ‘Compagnie in de West’ a fayece despues cu el a bay snorkel na Playa Porto Marie na Curaçao y a desaparece.

    Wardacosta di Caribe Hulandes a ricibi e notificacion tocante e Militar perdi, y nan a start cu un buskeda, pa e persona perdi aki. E helicopter di Wardacosta y e avion di patruyahe Maritimo, e Dash-8, despues di e notificacion inmediatamente a cuminsa un buskeda. E boto Metal Shark tambe a keda desplega canto di costa, y e Organisacion di Rescate CITRO a sostene esaki.  A pone bushinan di Marina Hulandes bay busca bao di awa.  Tambe coleganan di acerca di CIDW a busca cu alma y curpa.  Despues di algun ora a haya e curpa sin bida di e Militar.

    Famia- y coleganan a keda informa. Nan ta ricibi sosten di empleadonan di asistencia social y cuido spiritual mental.  E motibo di fayecimento ta bay wordo investiga.

   Apenas dos siman pasa, esta Diahuebs 15 di Februari, un turista Mericano cu ta di bishita cu barco crusero a bay snorkel cu famia na mesun Playa Porto Marie aki, y a desaparece.  A busca henter dia, y su siguiente dia y no por a haye.