“Mid term elections” pa  “We the People” di Merca

The content originally appeared on: Diario

Den un mundo di reto grandi Merca ta bay urna electoral — *Mester eligi un Senador pa reemplasa Vice Presidente Harris — *Tras di cortina di eleccion di “sheriff” te Miembro di Congreso

ORANJESTAD(AAN)—Mientras mundo no por haya solucion pa e guera di Ukraine; mientras cuminda ta bira mas costoso; mientras nos tin tur motibo pa tur dia nos sigui puntra nos mes ta den cual mundo nos ta biba, Merca ta prepara pa “Mid term” elections.

Uno di e accionnan democratico mas intenso na mundo ta den movecion pa conoce su culminacion dos aña despues cu Merca a eligi Presidente Joe Biden y dos aña prome cu na urna electoral wordo dicidi kende lo ta e proximo Presidente Mericano.

“Mid term”, na mitar periodo di gobernacion, ta duna prueba di uno di e sistemanan electoral y gubernamental mas intenso pero tambe mas bieu na mundo.

Fascinante ta e forma cu den e Constitucion Mericano a trata di inclui, tur elemento cu ta importante pa “We, the people”e palabranan cu den tur documento oficial,  mester confirma cu den gobernacion democratico, ta e Pueblo ta central.

Eleccion na Merca ta e forma cu Pueblo ta nombra un cantidad grandi di su funcionarionan, di Sheriff por ehempel, te Presidente di e pais.

E fecha di eleccion di e Presidente ta dicidi pa e fecha di eleccionnan “mid term” ora Pueblo bay urna electoral pa vota pa personanan cu lo dicidi a base di tur regla di “We, the people” kico lo pasa den Congreso pero tambe den funcionnan cu mester yena na estadonan y tur instancia cu mester sirbi e bienestar di Pueblo directamente.

Ora papia di politica na Aruba, nos ta pensa riba Gobierno y Parlamento.

Na Merca, politica ta yena cantidad di funcion (demasiado pa menciona aki) manera di sheriff.

Mester bisa si cu por ehempel pa e puestonan di sheriff, reglanan ta varia.

Ta sumamente interesante pa experencia con na Merca, e emocion electoral cu nos lo pensa cu ta na Aruba so ta existi, ta presenta nan mes.

E realidad di “Estados Unidos” ta bini dilanti den eleccion na e ciudadnan mas grandi, pero tambe aldeanan caminda bisiñanan ta biba mey hora aleha di otro.

Importante ta e resultado, cu mester produci na 2022, un total di 435 House of Representatives (Camara di Representantenan), cu cu Senado, ta forma Congreso di e pais.

35 di e 100 puestonan den Senado mester wordo yena pa medio di eleccion 2022 y uno di e puestonan ta esun cu a bira vacante ora Kamala Harris a bira Vice Presidente di Merca.

Riba nivel nacional na November 2022 lo no ta White House pero Capitol Hill cu lo ta den centro di atencion.

Capitol Hill ta adres di Congreso Mericano, cu ta consisti pues di House of Representatives y di Senado, cu ta e rango mas halto den representacion di Pueblo.

Caranan nobo pues, asina lo ocupa puestonan cu lo yuda dicidi pa mundo y ya nan ta wordo presenta na publico na caminda pa Mid Year terms.

Constitucion Mericano, considera como uno di e miho Constitucionnan na mundo, a trata di sigura for di 1789 e areglo legal pa e factornan mas importante di e Pueblo Mericano ta regla pa sirbi e Pueblo.

Dos partido, Partido Democrat y Partido Republicano, ta carga e resultadonan di eleccion aunke participacion di independiente tambe ta existi y sigur den proximo temponan lo bira mas un opcion.

Por lo pronto nos lo mira prominentenan di e dos partidonan mustra e votador, con nan ta traha pa e ciudadano pa asina yuda miembronan di nan partido, cu ta participa na e eleccion, haya voto.

Den e lunanan venidero nos lo sigui informa Aruba di e proceso electoral na Mid term di Merca, cu lo mester splica mundo politico Mericano cu awor ta activo, kico nan partido por spera pa eleccion presidencial y di resto di instancianan di autoridad, na 2024.