Mester ehecuta base di Masterplan Wever-Croes

The content originally appeared on: Diario

Aruba tabata tin un futuro delinea prome cu mundo a perde rumbo — *Salida di Quanten ta habri porta pa ahusta na futuro di energia — *Den un mundo caotico un plan structural pa reformacion di e pais

ORANJESTAD (AAN) — “Si tin un pais den Reino cu tin e hermentnan necesario pa habri caminda pa futuro den un motibo caotico, ta Aruba. Ora mira atras riba desaroyonan ta nota, cu Aruba tabata prepara pa sigui cana den un mundo cu ainda mester a basha abou.”

Mientras guera di Ukraine ta sigui su rumbo y segun dirigente di NATO lo dura algun aña mas, DIARIO siman pasa, a profundisa su mes completamente riba e realidad di Aruba, cu a wordo confronta cu diferente factor di preocupacion.

E decision di Quanten pa no sigui cu e proyecto refineria na Aruba, sin duda tabata un noticia hopi relevante, aunke e ta parti di loke DIARIO for di 2021 a anuncia como turbulencia petrolero nobo.

Un panorama mundial caotico ta presenta su mes na henter mundo. Manera DIARIO a splica incertidumbre grandi ta dal Merca, cu medidanan cu Gobierno Biden a tuma pa enfrenta aumento di prijsnan y cu ta subi costo di tur prestamo pa Pueblo y Comercio, cu mester paga mucho mas na interes.

Na mes momento, paisnan ta cera acuerdonan nobo pa entrega di petroleo y gas, cu a bira e negoshi grandi di mundo, cu mester prepara pa deshaci di petroleo y gas na 2050.

Na Aruba, Quanten a dicidi cu e no ta sigui cu su proyecto, cu probablemente e lo realisa cu Trinidad y Tobago den un region di Caribe, cu kier saca maximo placa di petroleo prome cu petroleo despedi.

“Kico ta bay pasa cu Aruba?” Esaki ta e pregunta pa cual DIARIO a busca contesta den un situacion mundial, cu segun expertonan hustamente a duna Aruba oportunidad pa prepara su mes pa un tempo, den cual catastrofe a topa cu catastrofe.

Informantenan ta indica cu Aruba for di 2014, mester a cambia rumbo na man di Hulanda ora Aruba a bira pais di debe.

Esaki a haci cu for di 2018, eficiencia den gobernacion mester a evita cu Aruba lo a bati bancarota. Mester a tuma medida pero tambe traha riba reforma di e maneho di e pais,

Na 2020, Covid-19 a paralisa mundo pero na Juli 2020, Gobierno Wever-Croes a presenta un plan concreto con na un forma structural hunto cu Reino, lo reactiva economia, atende un base adecuado pa labor; reduci burocracia y red tape; bini cu reforma di belasting; digitalisacion gubernamental; capacidad legislativo.

Na Juli 2020, Prome Ministro Wever-Croes a presenta e Masterplan, cu tabata base tambe pa atende cu Reino y permiti Aruba pasa dor di e periodo financieramente mas severo den historia moderno di e pais.

Den reactivacion di economia a bini e proyectonan di Eagle LNG y di Quanten, un compania Mericano cu sosten di State Department di Merca y di integrantenan importante di Partido Democratico di Merca, cu a presenta Quanten na diferente pais den region.

E negociacion Aruba y Quanten no a duna resultado den un temporada cu riba tereno petrolero mundial si desaroyonan serio a surgi y hasta un guera mundial petrolero actualmente a subi tur prijs na mundo y ta causante di un recesion mundial, pa cual ayera Diadomingo atrobe, International Monetary Fund a adverti.

E conflicto di Ukraine a pone mundo bolbe na e ultimo crisis petrolero grandi y a haci cu Rusia como pais productor mas grandi di petroleo na mundo, mester a pone su cartanan riba mesa.

E hecho cu pa diferente motibo, Aruba ya a cuminsa tuma medidanan y ta traha directamente cu Hulanda riba formulacion di un futuro nobo, a haci cu Aruba tabata prepara pa loke awe ta basha economia na paisnan grandi abou.

Aruba mester reemplasa Quanten y e entrada cu esaki lo a nifica. Segun informantenan e posibilidad pa atrae clientenan pa hur e tankinan, sigur ta un posibilidad.

Pa loke ta trata refineria, segun informantenan a keda demostra den e negociacionnan cu Quanten, cu e futuro di energia y e sumanan cu mester wordo inverti pa construi of drecha facilidadnan di un refineria existente, sigur a hunga un papel.

E situacion petrolero mundial y sigur den region di Caribe, no mester ta indice pa futuro pero mas bien con riba corto tempo ta saca maximo placa for di negoshi petrolero cu no solamente pa cambio di clima, ta importante.

Cientificonan ta splica continuamente, cu ta imposibel pa bisa cuanto tempo mas por haci negoshi cu petroleo, cu den 50 aña por caba den suelo.

E situacion mundial ta sumamente serio y ta marca pa confusion na tur pais, cu ta tuma medida serio.

Informantenan ta mustra cu destino a obliga Aruba pa actua prome cu mundo a basha abou na 2022 y cu awor Aruba mester ehecuta e Masterplan di Evelyn Wever-Croes den estrecho cooperacion cu Reino Hulandes.

DIARIO lo mantene Aruba informa.