Mester atende pakete total pa defende mucha!

The content originally appeared on: Diario

Plan Promer Ministro pa sigui subi castigo sigur ta importante


Un hende cu no tin concenshi, ta wordo considera psychopaat
Aruba y mundo lo no tin futuro sin mucha feliz cu no ta obheto 

ORANJESTAD (AAN) E hecho cu reclamonan solido a nace den comunidad pa defende e mucha den un mundo cu riba tanto tereno ta perde control, ta papia pa e Pueblo di Aruba, pais di moral y respet pa e ser humano for di su momento di nacemento.

Ehecucion di e trabou periodistico ta exigi di DIARIO, pa defende e victimanan di abuso sexual, cu ta wordo destrui como hende debi na e forsa fisico, forsa di posicion y poder, cu ta manifesta su mes na diferente forma den un comunidad.

Tragedianan cu Aruba a conoce cu mucha inocente, cu a wordo maltrata, abusa y hasta mata den e loke nan mester considera como nan seno familiar, ta e unico guia cu personanan cu ta considera nan mes autoridad, gobernante of periodista por sigui a base di Constitucion, di e realidad di Aruba como Estado di Derecho cu ley como su base.

For di e momento cu mundialmente a wordo decidi cu mester introduci un aña den cual ta atende cu e forma cu mucha a bira mercancia y obheto sin balor pa motibo di tanto cambio moral, DIARIO como fuente di periodismo tabata tin e deber, mescos cu tur otro instancia oficial, pa duna prioridad na e forma cu e derechonan di mucha como hende, ta wordo ignora.

Mester papia di un logro enorme di e ciudadano cu a kibra tur barera cu inhusticia a crea riba su caminda di bida pa e por defende su mes contra abuso.

Den tempo moderno, mundo ta papia di esclavo. Tin mas esclavo cu e mucha, cu ta bira obheto cu ta cambia di doño, pasobra e no por defende su mes?

Tin mas esclavo cu e ser humano cu ta mira su curpa herida, destrosa, manera ta pasa durante abuso sexual cu victimanan di loke ta yama nan mes hende, pero solamente ta sigui nan hamber sexual?

Nos ta papia di un mundo di adelanto, cu realmente ta bolbe na e base primitivo di hende, cu ta yama su mes moderno, pasobra e ta deshaci di su cualidad humano.

Hende ta entrega su balor mas importante y ta nenga di haci husticia na su mes y na otro hende, pa e por bende su mes na prijs barata.

DIARIO,  a pone su mes den contacto cu Prome Ministro Evelyn Wever-Croes, cu a confirma e balor di ciudadanonan di tur edad, na momento cu na 2020 el a subi e castigo pa abuso sexual di menor di edad, na e maximo den Reino.

Informacionnan cu DIARIO a ricibi, ta indica cu el a sigui intenta pa subi e castigo y actualmente hunto cu Hueznan ta trata na yega na un castigo mas halto pa uno di e crimennan mas askeroso cu ta abuso sexual di mucha, hasta di baby.

E realidad di loke un comunidad mundial, cu na 2024 ta pretende na yama su mes avanza, ta sumamente tristo y ta hiba hende atrobe na e temporadanan di un Nero, cu tabata complace su gusto cu morto hororoso di hende cu e tabata presenta como alimento na leonnan y tiger den arena na Roma.

Ora scucha relatonan di horor di victimanan di abuso, mester yega na e conclusion tambe cu mas ley mester wordo cambia.

Kico mester wordo cambia ta bini dilanti, ora scucha relatonan di personanan cu a bira victima di abuso sexual sin defensa di personanan cobarde, cu tabata bon na haltura di loke tabata pasa.

Leynan pa adopta mucha y e forma cu ta entrega mucha na cuido di otro persona cu no tin vigilancia continuo di institutonan oficial, mester wordo cambia.

Leynan cu ta subi castigo pa mayornan, cu ta permiti hende abusa di nan yiunan indefense, mester subi.

Defensa di e mucha mester ta na prome lugar y mester evita, manera awor den Tweede Kamer na Hulanda ta bini dilanti, cu e mucha ta wordo cumpra realmente pa bira victima di abuso!

Na 2024 un lucha sumamente importante mester haya sosten, sigur si tene na consideracion, loke a bini dilanti durante e epoca di Pandemia, ora hende no por a bay sconde pa su berdadnan y e dolor di sernan humano inocente, a culmina.

DIARIO ta sigui cumpli cu e mandato cu el a ricibi como medio di comunicacion despues di Covid-19 di instancianan internacional oficial, cu mester atende cu e victimanan di abuso sexual, cu mundo a trata na sconde.

Un hende sin concenshi no ta hende. Esaki hasta ta regla den Ley, cu ta considera hende sin concenshi, incapaz pa uza su base humano, como psychopaat, cu tin gusto den dolor di hende, cu ta homber y muher cu por defende nan mes pero tambe tur mucha, tur persona cu bida a haci debil pero cu ta mantene nan derecho oficial riba defensa den un estado di ley!