Mas pensionado ta reacciona riba estilo cruel di cobranza di Impuesto

The content originally appeared on: Diario

ORANJESTAD (AAN): “Nos como pensionado sa, cu segun e sistema fiscal aworaki, tin di keda paga impuesto cada aña. 

Esey no ta loke nos ta batayando awor,” un pensionado a indica den fin di siman na DIARIO.

   “Loke nos ta completamente contra, y ohala e organizacionnan di Pensionadonan y hasta Sindicatonan por presenta esaki na e lidernan di Impuesto y e Ministro concerni, ta e forma cruel y inhumano cu nan ta bin cobra e pober Pensionadonan diripiente cu 4 of 5 aña poni hunto di Impuesto, y exigi pago dentro di poco.”

   Pakico DIMP no a manda na 2018 e cobranza di 2016?
   Pakico DIMP no a manda na 2019 e cobranza di 2017?

   Pakico DIMP no a manda na 2020 e cobranza di 2018?

   Pakico DIMP no a manda na 2021 e cobranza di 2019?

   Pakico DIMP awor na 2022 ta dicidi na manda cobranza di 2016, 2017, 2018, 2019, y 2020 hunto?

   Pensionadonan ta spera cu e siman aki, sikiera Conseho di Ministro papia riba e asunto aki, y nan lo kier tende cualkier miembro di Partido MEP of tambe Partido RAIZ expresa algo di e sistema inhusto aki cu ta wordo pusha na forma di bulldozer riba schouder di e Pensionadonan.

   Hasta si Prome Ministro duna su opinion, ta algo cu Pensionadonan kier tende.  Pasobra tin di corda cu Pensionadonan NO tin ningun otro entrada.  Acaso nan tin di bay saca prestamo di Banco of otro Instituto Financiero pa por bay paga tur e Aanslag di ‘chain-reaction’ aki?