Mas atencion pa e base legal di turismo enfrente peligro!

The content originally appeared on: Diario

Cu diversificacion di acomodacion y mas turismo di aventura


E responsabilidad pa bienestar personal di turista mester ta conoci 

ORANJESTAD (AAN) Äruba ta parti di region di Caribe cu a drenta e temporada durante cual sistemanan tropical ta presenta nan mes y ta forma peliger pa comunidad y hende.

   Informantenan clave riba tereno di turismo a mustra con durante ultimo añanan por nota un aumento di e cantidad di turista cu no ta keda na hotel, pero ta prefera di haci uso di acomodacionnan mas economico.

   Esaki ta conduci na mas negoshi chikito riba tereno di acomodacion di turista, cu no solamente ta cambia destinacion di vivienda pa Arubiano den renta di acomodacion pa turista.

   Manera a wordo trece dilanti, sigur e cadenanan internacional di hotel ta prepara pa situacionnan di emergencia di tempo y tambe problemanan personal cu cual turistanan por wordo confronta.

   E acomodacionnan mediano tambe, cu ta pone nan mes na haltura di reglanan vigente y loke ta bira nan responsabilidad ora nan huur espacio na turista.

E aumento di parti di vivienda na turistanan ta haci cu hopi bez e personanan tras di e negoshinan aki, no ta mira e responsabilidad grandi cu nan ta asumi pa e turista, cu nan mester por acomoda ora problema presenta.

   Aruba no ta un caso unico den e cambionan cu a presenta den mundo turistico, cu conoce tur e beneficionan pero tambe tur e responsabilidad y asina posibel problemanan cu ta wordo crea ora acomoda personanan cu ta paga pa nan estadia.

Problemanan cu a presenta riba e tereno aki den mundo turistico internacional, ta mustra cu mester cuminsa adverti publico pa e problema serio cu un persona por cumpra pa su mes si e acomoda of presta servicionan na turistanan, cu por wordo confronta cu peligro di cualkier indole, incluso di condicionnan di tempo.

   Manera informantenan a trece dilanti, region di Caribe na 2024 a drenta un temporada di horcan, cu segun pronostico lo ta mas pisa debi na e cambionan di clima cu sigur e calor intenso ta sostene.

   Na mes momento den turismo internacional, a surgi un grupo cu hustamente ta busca loke nan ta considera “aventura” loke ta haci cu ta hustamente ora peliger bati na porta, nan ta presenta.

   Condicionnan fastioso por presenta si bishitantenan haya nan mes presenta cu gastonan pa cualkier problema causa pa naturalesa cu por afecta nan persona of nan pertenencia.

  Segun e informacionnan ricibi, no solamente mester prepara e habitantenan di Aruba pa e temporada di horcan 2024, pero tur instancia cu ta atende cu turista mester informa nan clientenan di tur peligro cu por tin.

   Den esaki mester haci uzo di expertonan, cu ta informa di pasonan cu mester tuma ora tin yobida pisa, ora tin peligro di lamper y tur loke por afecta e turista.

Segun informacion cu DIARIO a obtene, ta hasta mas prudente pa tur cu kier brinda acomodacion na turista, percura tambe pa nan tin aseguronan cu ta cubru cualkier por presenta.

   Algo cu ta sumamente importante ta, cu peliger ta wordo anuncia na un forma obvio pa evita cu problemanan serio cu por presenta.

   Den e recuperacion economico di Aruba, turismo a hunga un papel importante. Sinembargo, e ta nifica tambe responsabilidad enorme na tur momento sigur si cay den trampa di gruponan cu ta traha cu asina yama turismo di aventura, cu a proposito ta hiba nan clientenan na lugarnan cu condicion peligroso produci por ehempel dor di condicionnan di tempo.

   DIARIO lo sigui informa Aruba den un mundo di retonan nobo y especial.