Marisol Lopez-Tromp a sigui cuestiona Prome Minister pa sali na defensa di e werksternan di SKOA

The content originally appeared on: Diario

ORANJESTAD (AAN): Partido MEP a tuma nota e accionnan obsesivo den e ultimo tempo di Parlamentario Marisol Lopez-Tromp kende constantemente cuestiona Prome Minister Evelyn Wever-Croes.


E motibo di e esaki ta pasobra Prome Minister a sali na defensa di e werksternan di SKOA. Segun Partido MEP, ta parse cu Marisol tin un rabia den su curpa contra Prome Minister y e rabia ta domine.

Mester corda cu ex Minister di Enseñansa anterior, señor Rudy Lampe kier a kita tur e 60 werksternan di SKOA, lagando mamanan di famia sin trabou. Prome Minister Evelyn Wever-Croes mesora a sali na defensa di e werksternan, pasobra Gobierno kier a evita cu den pleno pandemia, ta manda 60 hende cas. Danki na su esfuersonan, e werksternan a keda na trabou, y cu awor Minister Endy Croes ta buscando un solucion pa nan.

Pero aparentemente pa Marisol esey no ta bon. Marisol a manda yama Prome Minister den Parlamento cantidad di biaha, pa bin duna cuenta. Prome Minister, corectamente, a contesta Marisol cu e mester yama e Minister di Enseñansa.

Marisol no a lage te eynan pero awor ta sigi cuestiona Prome Minister di con a sali na defensa di e werksternan. Mientrastanto e 60 personanan aki ta sumamente agradecido cu Prome Minister a yuda nan keda cu nan pan y nan trabou, y ta lamenta loke Marisol ta hasiendo.

Prome Minister Evelyn Wever-Croes cu tin un curason di mama, y ta compronde e dolor cu hendenan ta pasa aden, y cu a logra scapa trabou di 60 mama di famia.