Marihuana haya den un auto coriendo malisimo riba Green Corridor yen hoben aden

The content originally appeared on: Diario

ORANJESTAD (AAN): Diahuebs mainta banda di 11:30 am, un cantidad di yamada a drenta na Polis,

di chauffeurnan coriendo riba Green Corridor cu ta raporta cu nan ta mira un Nissan March shinishi coriendo zig-zag y hopi roekeloos riba caminda.  Nan a bisa cu e auto aki ta pasando otro vehiculonan sin ningun comprension pa seguridad den trafico, treciendo peligro pa tur hende.

   A raporta na Polis cu tin varios hoben den e auto, y nan tin un arma di candela den nan poder tambe.

   Unidad di Polis di Santa Cruz a wordo manda direccion di rotonde di Balashi pa bay check si por topa cune.

   Despues yamada a drenta, cu e Nissan March shinishi aki a tuma e caminda di Rooi Frances rumbo pa Sabana Basora.  Relaciona cu esaki, Polisnan a dicidi e tuma di pasa bay via Rooi Frances direccion Sabana Basora tambe.

   Ora cu nan a yega na altura di un cas na Balashi, e chauffeurnan a mira e Nissan March shinishi aki pasa bay direccion nort banda di nan.  Como cu tabatin dos patruya di Polis e momento ey, nan a core duna e chauffeur un señal pa stop, y el a haci esey tambe.

   Na momento cu e auto a stop, tur e agentenan a tuma hopi precaucion di seguridad, mirando e hecho cu a raporta cu nan lo tin arma di candela.   Di leu tabata duna instruccion y bisa nan pa uno-pa-uno baha di e auto.   Asina uno-pa-uno tabata listra nan curpa, pa check si nan tin arma.

   No a haya nada riba nan cu tin di haber cu arma.

   Nan a listra tambe den e Nissan March, y den e auto a haya un schoudertas chikito color preto, cu ta contene dos sakito transparente di plastico conteniendo marihuana.  Nan a resulta di ta pertenece na e hoben di inicial V.  Autoridad a confisca e droga.

   Ora cu nan a papia cu e chauffeur di inicial J., a papia fuerte cune riba su estilo di core auto riba caminda.  Nan a recorde cu ta un Nissan March e ta coriendo, y no un sportscar.  Polis tambe a check su schoudertas tambe y aki a bin haya un grinder di color biña y den dje tabatin marihuana.  E droga aki tambe a wordo confisca.

   E otro ocupantenan ta di inicial T., tambe di inicial C., y di inicial V.

   Na final tanto Central di Polis como tambe Hefe di Servicio a wordo notifica di e asunto.