Manipulacion politico cu hidrogeno pa destabilisa Aruba

The content originally appeared on: Diario

DIARIO cu prueba con Gasunie ta cuminsa awor cu hidrogeno na Hulanda — *Eagle y Quanten mester tene na Ley Mericano pa comercio mundial — *Quanten ta traha cu experto consehero di Gobierno Mericano riba clima


ORANJESTAD(AAN)—“Pa un compania Mericano haci negoshi cu exterior, e mester tene su mes na reglanan estricto. E mester tin permiso pa e por haci negoshi cu exterior, manera ta e caso cu e compania Eagle LNG cu ta un compania Mericano di reputacion internacional.”

Esaki ta informacion concreto cu DIARIO a ricibi cu e advertencia pa Aruba, cu wega politico no por susha nomber di un compania, cu sin ningun prueba ta wordo acusa di ta participa den cualkier acto ilegal of di ta crea scandal na Aruba.

Un situacion sumamente serio, cu tin su origen den wega politico di nivel baho, ta menasa di hinca Aruba den problema sumamente serio.

“Gobierno Wever-Croes no ta atende cu un dictador di mala fama na Venezuela. Tanto Eagle LNG como Quanten ta companianan di renombre cu ta cumpli cu leynan di Merca y mester mantene nan mes na un conducta comercial halto.

Informantenan di DIARIO den exterior no tin palabra pa e weganan politico baho den cual acusacionnan politico ta wordo lansa.

“Ta obvio cu e politiconan en cuestion, no sa di kico nan ta papia,” informantenan a trece dilanti.

E hecho cu awe RAIZ a causa un crisis den Gobierno pasobra e no kier e planta di gas di Eagle LNG despues di a firma un acuerdo di Gobierno cu a inclui e proyecto, a habri caminda pa mas turbulencia na Aruba na un momento internacional sumamente critico.

Informantenan experto a mustra cu ta absurdo cu RAIZ ta papia di hidrogeno na Aruba cu por crea un base pa energia mas limpi cu gas.

Informacion a wordo duna na DIARIO di Gasunie cu awor a cuminsa cu e plannan pa introduci hidrogeno na Hulanda.

Hidrogena, cu na Hulandes ta wordo yama “waterstof” ta un componente cu ta mas peligroso cu gas.

For di Diasabra DIARIO a indica cu Gasunie di Hulanda a duna di conoce cu mester di un infrastructura special pa hidrogeno, cu segun RAIZ mester wordo busca na Aruba pasobra esaki ta e combustibel di futuro.

Raiz ta sali for di e punto di bista cu lo gasta hopi placa riba infrastructura pa despues mester pasa pa hidrogeno.

Informantenan ta indica cu aparentemente RAIZ no a tuma e molester pa atende cu Hulanda y mira cu por uza e instalacionnan di gas pa hidrogeno y Hulanda mester awor ta cuminsa pone base pa hidrogeno.

DIARIO a haya copia di planificacion di Gasunie pa Hulanda, cu ta mustra con na Hulanda lo introduci hidrogeno y cu e proyecto aki lo ta completo na 2050, ora Aruba tambe lo bandona entre otro gas, manera Gobierno di Aruba a confirma den acuerdonan internacional.

Si e proyecto di gas di Eagle ta cla na 2024, e base por wordo uza pa sigui traha riba e cambio pa hidrogeno cu ta mucho mas caro cu e base pa gas.

DIARIO ta den contacto directo cu informantenan internacional despues cu no awe, pero pa basta tempo DIARIO ta atende na un forma intenso na e situacion di combustibel na mundo.

Durante ultimo lunanan na un forma continuo DIARIO a prepara Aruba pa loke ta resultado di e Conferencia di Cambio di Clima y Gobierno Wever-Croes continuamente a papia di su esfuerso pa Aruba tene su mes na e palabracionnan.

DIARIO awe ta entrega Aruba e planificacion di introduccion di hidrogeno na Hulanda.

E decision di Gobierno Hulandes pa hidrogeno, cu ta haci Gasunie un super productor, ta hopi recien y awor na Hulanda ta busca e fondonan pa realisa e plannan sumamente costoso, cu ta crea resistencia tambe na e pais.

Na Aruba por nota con un asunto serio pa hende, ta wordo utilisa pa destabilisa Aruba.

DIARIO lo sigui informa Aruba di tur desaroyo y ta pidi Aruba pa keda trankil y informa nan mes di desaroyonan mundial cu DIARIO no ta trece como wega politico pero pa prepara Aruba debidamente manera atrobe ta keda proba.