Maneho financiero actual di Aruba ta un logro!

The content originally appeared on: Diario

Segun indice financiero y economico di Fondo Monetario Internacional


Reforma structural ta exigi inversion nobo y aumento entrada di pais
Maneho mester reduci costo di prestamo y necesidad pa busca fondo 

ORANESTAD (AAN) Den un situacion internacional di guera y instabilidad continuo, mundo tabata en espera di e rapport cu lo a wordo emiti pa Fondo Monetario Internacional.

   Mientras e rapport pa DIARIO naturalmente ta sumamente importante pa por sigui informa Aruba cu responsabilidad, pa DIARIO tabata di sumo importancia tambe pa por constata pa su mes, cual ta e maneho cu den e situacion mundial actual, ta wordo recomenda dor di e Fondo Monetario Internacional cu ta sostene e maneho financiero, monetario y economico di paisnan.

   Ora papia di e rapport aki, ta papia di loke ta pasa na e paisnan mas grandi y financieramente poderoso di mundo te e paisnan financieramente, economicamente y social mas debil y peligroso pa motibo di nan posibilidadnan basico productor, pero tambe nan tamaño.

   Aruba ta cay den e sector di economianan chikito y si tene cuenta cu e debe nacional, e peso di interes cu Aruba mester paga pa prestamonan pa por alimenta su necesidadnan financiero y gastonan cu un pais mester haci pa sosten di su economia, por considera Aruba parti di e economianan debil y sigur peligroso sin un bon maneho.

   Na mes momento mester tene na consideracion, e crecemento economico di Aruba a base di proyectonan cu ta wordo atrae dor di Gobierno Evelyn Wever-Croes, cu ta tene su mes na e formula financiero di percura pa entrada dor di un maneho di expansion economico mara na un forma responsabel pa haci gasto.

Por papia pues di un situacion balancea, cu ta bini dilanti directamente den e rapport di e Fondo Monetario Internacional.

Den e relato di April 2024, IMF ta papia di un logro grandi durante e ultimo añanan cu a wordo alcansa na paisnan cu un economia creciente (emerging market economies) cu ta fortalece nan maneho monetario, fiscal (di belasting) y financiero cu exito.

E prueba cu Aruba a tene su mes na e formula aki ta, e presupuesto nacional di Aruba cu no ta cera mas cu debe, pero cu un saldo positivo, a pesar di e peso di pago di e debe nacional y otro gastonan manera proyectonan PPP cu a wordo manda pa futuro, cu ta exigi pues cobranza di impuesto na Aruba.

E situacion mundial actual y su resultado pa economia mundial ta mustra cu economia mundial lo sigui crece cu 3.2 porciento durante 2024 y 2025 cu e mes velocidad cu a conoce na 2023.

Ta spera un aceleracion chikito pa economianan avanza, cu lo conoce un crecemento di 1.6 porciento pa 1.7 porciento na 2024 y di 1.8 porciento na 2025, por wordo confronta cu un caida leve na economianan den desaroyo cu 4.3 porciento na 2023, 4.2 porciento na 2024 y 2025.

E crecemento mundial dentro e proximo cinco aña, lo ta 3.1 porciento cu lo ta e cifra pa crecemento mas abou, cu a wordo registra durante e ultimo decadanan.

Den su proximo edicionnan, DIARIO lo sigui presta atencion na e pronosticonan di Fondo Monetario Internacional, cu sigur ta wordo influencia pa e turbulencianan enorme na mundo y factornan cu DIARIO lo trece dilanti den su proximo publicacionnan.