Maneho di permiso pa negoshi a wordo moderniza

The content originally appeared on: Diario

Minister Geoffrey Wever:   — *Permisonan ta keda cla hopi mas lihe

ORANJESTAD (AAN): Durante un conferencia di prensa Dialuna, minister di Asuntonan Economico Comunicacion y Desaroyo Sostenible Geoffrey Wever a papia riba modernizacion di e maneho pa locual ta trata permiso di negoshi.

Minister Wever a cuminza na bisa cu tur hende cu kier cuminza un negoshi na Aruba tin mester di un ‘vestigingsvergunning’(permiso di negoshi) y tur hende cu kier ta director di un compania tin mester di un ‘directievergunning’, cu ta wordo duna pa e minister di Asuntonan Economico , basa riba un ‘vestigingsbeleid’.

“Pa hopi aña diferente comerciante, gremio comercial, startups y stakeholders den e mundo comercial tabata indica cu ‘red tape’ ta un fenomeno cu ta tranca desaroyo di nos economia y cu eliminacion di red tape lo yuda economia draai bon, unda cu companianan por estblece nan mes mas lihe”.

Pa hopi aña caba profesionalnan tabata vocifera cu mester bon cambio den e sistema via cual Gobierno ta duna permiso y pa haci esaki den un forma mas acelera, segun Wever.

El a splica cu ora cu el a bira minister el a pone como prioridad pa traha riba reduccion of eliminacion di red tape.

Segun e mandatarionan, den ultimo lunanan el a traha hunto cu Departamento di Asuntonan Economico y cu diferente otro stakeholder, revisando e rapportnan cu tabata tin di localnan, companianan internacional y e gremionan di Aruba.

“Haciendo tur esaki nos a bin na e revision di e vestigingsbeleid”.

Awe despues di 1 aña den gobernacion mi ta contento di anuncia cu e vestigingsbeleid a wordo moderniza, simplifica y digitaliza completamente.

Meta di e modernizacion aki ta pa elimina red tape y pa stimula mas negoshi pa lanta na Aruba, pasobra ora cu tin mas negoshi tin un spinoff economico, mas cupo di trabao ta wordo crea y asina tambe e parti di coleccion di Gobierno ta bay dilanti, mientras cu nos ta desaroya nos economia na un forma mas moderno, segun e minister.

El a splica cu e vestigingsbeleid nobo ta contene diferente cambio, di cual el a enfoca Diahuebs riba e 7 puntonan cu e ta considera mas importante.

Ta trata di reduccion di red tape, digitalizacion completo cu introduccion di un data base pa comerciante, ampliacion di e categoria di persona cu no mester pidi un permiso mas, stimulacion di inversion den centro di Oranjestad y centro di San Nicolas, stimula economia door di diversificacion via e 6 sectornan prometedor, ta duna companianan chikito(startups) bao di cierto condicion  e permiso pa tin e compania na cas den un zone residencial y tambe a introduci e principionan di sostenibilidad pa algun categoria.

Segun e mandatario a elimina hopi rekisito y documento pa haci e proceso mas agil y facil, pa asina e permisonan por sali mas lihe.

El a duna un ehempel bisando cu antes un persona cu tabata busca un permiso mester a bay Camara di Comercio y pidi un ‘uittreksel eynan y e mester a pidi pa un papel di Censo.

Wever a indica cu esakinan ta servicionan cu bao di e vestigingsbeleid nobo, e Departamento di Asuntonan Economico ta bay ofrece e cliente.

Esaki ta nifica cu e persona cu ta buscando e vestigingsvergunning pa habi un negoshi no mester haci esakinan su mes mas.

Asina na un forma digital ma acelera, e comerciante ta wordo yuda y e permisonan por sali mas lihe.

E meta ta pa keda cla cu permisonan pa Oranjestad of San Nicolas dentro di 10 dia.

Pa otro tipo di permiso esaki lo dura 2 siman.