Maltrato contra homber di edad den bar na Piedra Plat

The content originally appeared on: Diario

Agresor a keda deteni:

ORANJESTAD (AAN):   Diasabra marduga, cerca di 3’or, varios unidad policial a bay na Weng Kee Bar situa na Piedra Plat, unda un problema grandi tabata desaroyando.

            Na mes momento, polis a recibi un yamada pa atende un otro situacion na Mon Pos, caminda un persona di edad a wordo maltrata di manera serio.

            Investigacion a revela cu e victima cu a yega na e adres na Mon Pos, anteriormente tabata na Weng Kee Bar unda e maltrato a cuminsa. E agresor, conoci como M. a sigui su victima te na Mon Pos.

            Polisnan a solicita asistencia medico pa e victima y nan a bay Weng Kee Bar, unda nan a detene M. despues di un confrontacion cu un multitud presente.

            Cuater polis a solicita asistencia di coleganan di otro districtonan pa yuda controla e situacion. Eventualmente nan a logra maneha e situacion y manda e hendenan cas.

            Entre tanto, paramediconan a transporta e cabayero herida cu urgencia pa Hospitaal, unda a atende su heridanan serio.

            E caso ta bou di investigacion y den man di recherche.