Malta Balashi a uni forsa cu Fundacion Ban Uni Man pa Cria nos Muchanan

The content originally appeared on: Diario

ORANJESTAD (AAN): Malta Balashi ta orguyoso di comparti su aliansa cu Fundacion Ban Uni Man pa Cria Nos Muchanan.

Un organizacion cu e meta di provee mas tanto mucha den necesidad posibel cu un desayuno tur dia. Malta ta un producto iconico pa e comunidad di Aruba. Un producto cu a compaña nos durante nos infancia te na grandi y cu a refresca nos riba schoolplein cu nos amigitomam como tambe cu nos dushi pastechi manera ta e tradicion di mainta.

   Actualmente tin un total di 812 mucha bishitando 65 scol rond di Aruba cu Ban Uni Man pa Cria Nos Muchanan ta provee cu desayuno. E aliansa entre Malta Balashi y Ban Uni Man pa Cria Nos Muchanan ta estableci desde aña 2023 dunando apoyo financiero mensualmente na e organizacion pa nan por sigui cumpli cu nan meta di alimenta mas tanto mucha den necesidad posibel.

  Pa por sigui engrandece e apoyo na e organizacion, Malta Balashi ta extende e aliansa pa inclui e pueblo di Aruba. Cu cada compra di un Malta Balashi, bo ta contribui financieramente na Ban Uni Man pa Cria Nos Muchanan, percurando cu e organizacion tin e fondonan necesario pa sigui cumpli cu nan meta y demanda actual como tambe cualkier aumento.

   Muchanan cu ta cuminsa nan dia cu un desayuno tin mas energia y cu miho enfoke pa haci nan maximo esfuerso pa ta productivo. Bo compra di Malta Balashi por haci e diferencia, creando un impacto positivo pa e futuro di nos muchanan.

   “Esaki ta comienso di un aliansa pa un termino largo cu nos producto local Malta Balashi tin cu nos muchanan.” Segun Portfolio Coordinator Jessica de Veer.