Maduro y Putin ta topa otro den conkista teritorial

The content originally appeared on: Diario

Advertencianan di DIARIO contra situacion regional confirma

*Advertencia di Reino contra viahe pa Venezuela ta keda valido

*Bista mundial dirigi riba Merca den porta di eleccion Mericano 

ORANJESTAD (AAN )— “Reino Hulandes a adverti su ciudadanonan cu Venezuela ta peligroso. Viahenan pa e pais ta wordo desaconseha y den tur conseho ta bini dilanti cu e persona cu bay Venezuela no por conta sin mas riba asistencia Hulandes den casonan di problema.”

Palabranan di expertonan internacional cu ta fungi como informante di DIARIO no ta laga lugar pa duda.

For di basta tempo pasa, a base di nan informacionnan, DIARIO a mustra continuamente riba e problemanan serio cu tin na Venezuela.

Reino cu ta responsabel pa bienestar di e ciudadano Hulandes, den su consehonan oficial pa personanan cu kier biaha pa Venezuela ta splica con peligroso e pais ta.

Pero no solamente pa e personanan mes, pero tambe como pais cu ta respeta e teritorio nacional di otro, tambe na varios ocasion DIARIO a mustra riba e peliger cu Nicolas Maduro ta pa seguridad regional di Aruba.

Cu Nicolas Maduro no ta respeta e integridad a bini dilanti entre otro, ora publicamente el a declara cu Aruba ta den awanan teritorial di Venezuela, cu ta un ponencia cu expertonan semper a considera sumamente peligroso si e ta bini di Maduro, cu ta e homber di confiansa di e dirigente Ruso, Putin, den teritorio Latino Americano y den Caribe.

Informantenan ta pone e hecho cu Nicolas Maduro pa medio di un referendum ta trata na duna mundo un indicacion cu e lo dirigi esfuerzonan pa na un forma of otro reclama derecho riba Essequibo cu ta oficialmente parti di Guyana, como prueba cu na fin di 2023 un peliger grandi ta rementa den porta di Aruba pasobra cu e ponencia di Nicolas Maduro, un situacion di emergencia ta wordo crea pa mundo.

Aunke Nacionnan Uni ta duna nan sosten na Guyana como teritorio cu mester wordo respeta, informantenan ta mustra cu esaki no ta ningun indicacion, cu cualkier momento Nicolas Maduro no ta dicidi cu e ta anexa e teritorio aki mescos cu Rusia ta haci cu teritorionan manera Ukraine, loke a conduci na e guera di Ukraine.

Informantenan ta indica cu e referendum cu Nicolas Maduro a tene no tin ningun prueba di validez directo y tin duda internacional cuanto hende a participa realmente na e sondeo di opinion riba e hecho cu Essequibo mester wordo considera teritorio Venezolano.

Den porta di eleccionnan na Venezuela y Merca, e situacion actual ta wordo considera como un reto na Merca tambe, cu a cuminsa habri porta pa Nicolas Maduro a base di e eleccionnan liber of no.

Nacionnan Uni a expresa nan opinion riba e forma cu Venezuela lo por trata a uza e resultado di referendum pa trata na anexa parti di Guyana.

Sinembargo, informantenan experto ta splica cu ningun momento mester a tene un referendum di e indole aki y cu sigur pa Aruba, e situacion actual ta crea necesidad serio no solamente pa maximo medida di seguridad nacional, pero tambe pa urgi tur Arubiano pa na ningun forma trata na e momentonan aki pa bay Venezuela y practica maximo seguridad tambe riba tur tereno enfrente Venezuela.

Manera DIARIO a anuncia basta dia, mas e dia di eleccion na Venezuela ta acerca, mas peligroso e situacion regional ta bira.

Informantenan ta indica cu awor mas cu nunca Aruba mester ta den estado di alerta pa loke ta pasa na Venezuela.

Mientrastanto bista di mundo tambe ta dirigi riba Merca y sigur Presidente Biden cu a yega na un areglo hopi discuti na Merca cu Nicolas Maduro, cu a kibra e acuerdo pa yega na eleccion limpi cu e forma cu ta atende cu e candidato di oposicion Venezolano den proximo eleccionnan.

“Realidad mundial ta cu Nicolas Maduro ta mara na Putin, cu ta productor di invasion di Ukraine cu e kier haci teritorio Ruso,” informantenan a indica cu preocupacion grandi pues pa e forma cu Nicolas Maduro a papia di Aruba den awanan teritorial di Venezuela.