LVV y Minister Arends a brinda un presentacion den Parlamento na e delegadonan di Suriname

The content originally appeared on: Diario

Directora di Santa Rosa, Natalie Maduro:

*Den cuadro di un posibel colaboracion comercial 

ORANJESTAD (AAN) – Delegadonan di Surinam a haya un presentacion den Parlamento di Aruba, den cuadro di un posible colaboracion comercial cu Aruba.

            E presentacion aki a wordo duna door di e directora di Departamento di Agricultura, Cria y Pesca (LVV-Santa Rosa) Nathalie Maduro hunto cu Minister Ursell Arends, titular di Sector Primario.

Maduro a indica cu Surinam ta un pais cu ta genera hopi producto fresco, incluso nan tin surplus. “Den pasado nos tabata tin cierto combersacionnan caba cu Surinam, y mi mes a yega di bay cu un ‘mission trip’ entre e islanan. Nos tabata brainstorm y mi ta kere cu un barco mester. Esey ta algo cu lo por acerca Hulanda pa nos hay’e. E bon di Surinam tambe ta cu nan tin hopi conocemento practico.

            Aworaki, di locual nos a presenta nan feed back ta cu nan por yuda nos, no solamente cu e parti di cuminda pero tambe si nos mester assessment (evaluacion). Un peticion di mi persona na nan, tabata, kizas, ayudo tecnico pa cierto sistemanan cu nan ta usando y cu podise nos no ta mucho familiariza ainda cu ne”, Nathalie Maduro, director di LVV a señala.

            Maduro a menciona cu como Santa Rosa, nan ta trahando caba cu un compania di Surinam. Esaki ta cu señor Delano Ponit, di Hydroponics Technologies. Pues e lazonan tabata tey caba, pero e biaha aki ta un tiki mas formal.