Lotto pa Deporte ta bek den man di Aruba

The content originally appeared on: Diario

Prome Minister ta gradici Minister Oduber y Minister Croes 

ORANJESTAD (AAN):  E siman a habri cu un awa cero torencial di bendicion grandi riba nos isla. Sinembargo, Prome Minister Evelyn Wever-Croes a expresa, nos pais no solamente a ricibi e bendicion di un dushi yobida, sino a ricibi tambe e bendicion cu e logro cu Lotto pa Deporte ta bay cay den man di Aruba atrobe.

            Dialuna mainta, den un conferencia di prensa di Gobierno di Aruba na Renaissance Convention Center, Minister di Deporte, Endy Croes a anuncia cu despues di hopi negosacion fuerte y honesto cu Canadian Bank Note, uzando su metodo di maneho di e 4D’nan, Deseo, Disciplina, Dedicacion y Determinacion, a logra cu Lotto pa Deporte ta bek pa pais Aruba.

            “E logro di awe realmente ta yena mi cu un emocion hopi particular. E logro di awe, ami ta considera uno importante, impactante y historico. Esaki ta muestra cu ora cu di berdad ta traha duro cu dedicacion y determinacion, ta logra cosnan grandi”, Prome Minister a expresa.

            Desde inicio di Gabinete Wever-Croes I na 2017, a encontra retonan riba e tereno di deporte. Minister di Deporte e tempo ey, Dangui Oduber, a lucha hopi duro pa duna deporte e luga cu e merece mientras cu a pasa den hopi reto den temponan no facil. Pero pa e Minister Oduber, deporte tabata tin un prioridad hopi halto.

            “Gabinete Wever-Croes II completo ta di acuerdo cu deporte mester haya prioridad na Aruba, apesar di e pandemia y crisis financiero. Cada hoben deportista ta un hoben menos riba caya. Cada hoben deportista ta un hoben cu ta bay haci cosnan grandi pa su pais”, Prome Minister e enfatisa.

            Prome Minister a gradici Minister Dangui Oduber como Minister di Deporte den Gabinete Wever-Croes I cu a haci su maximo esfuerso pa awe nos a logra cu Lotto ta bek pa Aruba. Tambe Prome Minister a gradici Minister Endy Croes cu tabata tin e Deseo aki pa Aruba. Cu Disciplina el a sigui traha riba e proyecto pa rescata Lotto bek. E no a laga nada stroba su Dedicacion pa logra. Y cu e Determinacion di tur dia, awe Minister Endy Croes por anuncia cu el a logra. Cu e logro aki, Lotto pa Deporte ta sali gana. Nos hobennan deportista ta sali gana. Aruba ta sali gana. Pabien Aruba.

            Concluyendo, Prome Minister Evelyn Wever-Croes a expresa cu ohala e logro aki ta uno permanente tambe y nunca mas ningun gobierno cambia e prioridad pa deporte den desventaha pa deporte manera tabata e caso den e Gabinete di e otro signatura.