Locutor Ivo Yanez ta e prome persona cu a opina cu Kiara un dia lo bay bira Miss Universe Aruba

The content originally appeared on: Diario

E candidata mes a divulga

ORANJESTAD (AAN): Diadomingo anochi den Crystal Theatre na Renaissance Mall a tuma lugar e anochi ora cu Star Promotion Aruba a corona e dama hoben cu ta bira e representante nobo di e isla pa e certamen di Miss Universe.

   E simpatica Kiara Arends ta e persona cu a wordo escogi pa tuma rienda over for di Thessaly Zimmerman pa haya e corona di Miss Universe Aruba 2022.

   Cu aplauso constante, y riba escenario cu un bistir unico y hopi yamativo, Kiara Arends di 23 aña a wordo instala ora Ministro Xiomara Maduro a pone e sjerp na su curpa, y posteriormente Ministro Ursell Arends a pone e corona riba su cabez.

   “No tene miedo di e espacio mey-mey di bo soñonan y realidad, pasobra bo soñonan ta un deseo cu bo curazon ta haci,” Kiara a bisa den microfono.  El a bisa cu pa hopi tempo el a cana cu e deseo di bira Miss Universe Aruba den su curazon.  E ta kere cu tur cos a cuminza tempo e tabatin 8 aña di edad y ta canta cu e grupo ‘Muchanan Sabi’ y e conocido locutor Ivo Yanez ta esun cu pa prome biaha a bis’e esey, esta cu un dia e lo bay bira Miss Universo.

   Kiara Arends cu 8 aña di edad no a compronde kico esey a nifica, y el a bay puntra su tata, e conocido comerciante Karel Arends pa sa kico Ivo Yanez ta referi na dje, pasobra e mes como mucha chikito no a compronde e nificacion.  Su tata a sinta y splica Kiara loke a pasa cu su amiga Maureen Vieira kende a sali finalista di Miss Universe 1974.  El a bisa cu Maureen a bira un persona hopi stima na Aruba y tambe rond mundo.

   Kiara a bisa, cu su tata tabatin costumber di usa su soño pa bira Miss Universe como excusa pa siñ’e con ta sinta como un dama, con pa usa forki y cuchiu corectamente, y su mama Debrah tabata gusta haci chiste cu Kiara a nace den e famia robez, pasobra el a rechaza di come usando su mannan, y semper e tabata conciente di su propio imagen.

   Su mama a siñe tambe pa ta un persona hopi cariñoso y humilde, pa ta un trahador fuerte y su dicho semper tabata: “Haci bo best ta semper mas importante cu ser e mihor.”  Segun Kiara, bida a siñ’e esey na e forma di mas duro, pasobra na varios ocasion e no a logra yega na di 1er lugar.

   Ora e tabata avion bayendo bek pa Aruba, e tabata yorando y su tata aki a bise:  “Bo a mira e forma cu e avion ta lanta vuelo?  E ta haci esey contra biento.  Esey ta e forma con bo tin di experiencia bida.  Pasobra tur obstaculo cu bo enfrenta mester ta un oportunidad pa bo avanza na un nivel nobo.”

   Kiara a bisa cu awor, cu tur e obstaculonan cu el a enfrenta, y tur e logronan obteni, porfin e por bisa cu e imagen cu e ta carga den su curazon pa un dia bira Miss Universe, porfin ta birando un pelicula.

   Su discurso a wordo duna na Ingles, Papiamento, Hulandes, y Spaño.