Lo modernisa e ley di seguro medico cu lo yuda baha gasto na un manera sostenibel

The content originally appeared on: Diario

Parlamentario Hendrik Tevreden (MEP):

ORANJESTAD (AAN): For di hopi tempo ta buscando un otro alternativa pa evita introduccion di eigen bijdrage. Y e anuncio dialuna di parti di gobierno y Minister Dangui Oduber a confirma cu si a haya un otro alternativa.

            Eigen bijdrage ta un contribucion pa yuda e fondo di AZV, kiermen cu e persona cu bishita dokter lo mester paga algo momento e bai pa un cita. Esaki lo por resulta cu hende no ta bishita dokter zomaar y ta yuda na reduci e bishitanan y acumula fondo.

            Den Parlamento nos no tawata di acuerdo cu e direccion aki y ta pensa cu tin otro alternativa y netamente esaki minister Dangui a presenta dialuna na pueblo.

            Manera tur hende sa CAFT a recomenda e eigen bijdrage pa por yega na e recorte di 60 miyon pa AZV, pero mes momento CAFT no tawata habri pa introduccion di un ayudo social pa esun nan cu no por paga e eigen bijdrage. Esaki ta nifica cu si un hende no tin placa pa e paga pa su cita, kisas e no lo haya cita of no lo scoge pa bai su afspraak cu dokter. Nos ta pensa cu no por hasi esaki cu esun nan margina den nos comunidad cu kisas no lo por paga extra. Pesey parlamento a boga pa bini cu un alternativa. 

            AZV lo a spaar cobrando eigen bijdrage alrededor di 3-4 miyon florin. Cual minister Oduber a busca e suma aki otro caminda pa por cubri’e. A haci estudionan y a conduci hopi sesion y reunion pa logra yega na un alternativa y a conclui cu lo bai modernisa e ley di seguro medico cu lo yuda baha gasto na un manera sostenibel. Tambe den e rapport di profesor Hubben, tin recomendacionnan haci unda por reduci e gastonan actual.

            Algun ehempelnan practico ta pa unifica e dos hospitalnan, haci compras di remedinan hunto cu lo por reduci e prijs ora di negocia mirando cu ta papia di un cantidad mas grandi. Mas ainda, tin un pensamento cu tin di uni cu otro islanan den cumpra remedi cu lo tin un efecto di spaar mas hopi.

            Otro cambio cu lo bini ta e landsbesluit verpakte geneesmiddelen y lo tin di bay stimula competencia y percura pa cu apotheekprijs lo tin e base (richtlijn centraal) pa calcula e prijs di remedinan importa pa evita sumanan extravagante riba remedi.

            Hunto cu tur esakinan lo tin di facilita y acelera e proceso di registracion di remedi tambe. Cu e cambionan aki lo por spaar entre 7-8 miyon pa aña, cual ta 2 biaha mas cu eigen bijdrage plus acelera servicio.

            Nos ta contento cu minister Dangui y su ekipo ta sigui busca solucion na bienestar di AZV y nos comunidad. Pasobra nos sa cu e fondo tin di wordo salvaguardia pero cu nos mester percura pa nos ciudadanonan cu tin e dificil tambe por permanece cu e calidad di cuido y pagabel.