Lo cuminsa crea un structura solido pa Serlimar

The content originally appeared on: Diario

Minister Ursell Arends

ORANJESTAD (AAN): Diahuebs durante ful un dia Minister Arends hunto cu su ekipo a topa cu trahadonan di Serlimar unda a duna aclaracion di e situacion di Serlimar.  

            Durante e encuentro a duna un splicacion amplio di con Serlimar a yega den e posicion cu e ta awor. Aki diferente trahado a bin compronde cu debi na metemento politico Serlimar tin un debe di alrededor di 20 miyon florin. Esaki ta haci cu e compania a bira praticamente bancarota.

            Ademas, a duna mas detayes pa loke ta trata e plan y vision pa futuro di Serlimar. 

Di principio cu Minister Ursell Arends a asumi su puesto como Minister a cuminsa traha un “blue-print” di con ta bay rescata Serlimar alabes trece un solucion pa e problematica di desperdicio cu e isla completo ta biba cu ne.

            Pa logra esaki mester cuminsa na tuma decisionnan prudente pero tambe cooperacion y determinacion di banda di Gobierno como tambe di banda di trahadonan. 

            Lo cuminsa crea un structura solido pa Serlimar pa asina sigura un futuro pa tur su trahadonan y alabes pa Serlimar por bira competitivo riba mercado nacional. Minister Arends a aloca fondo pa yuda cu e proceso aki. 

            Sigur un encuentro fructifero unda cu trahadonan a keda contento di por a tende e berdad for di esnan concerni y no sigui kere den informacion nan eroneo cu tin ta sali afo via media y medianan social. Minister Arends a haci un suplica na ambos gerente y trahadonan pa yega na palabracionnan concreto y pa cu e comunicacion entre tur parti wordo mehora na benificio di tur.