Lo amplia e orario di operacion di e liña di telefon 125 pa e adultonan mayor

The content originally appeared on: Diario

Un aña di Proyecto 125 na Aruba


Gobierno ta traha na bienestar di nos grandinan 

ORANJESTAD (AAN): Diamars atardi, Prome Minister Evelyn Wever-Croes a atende e celebracion di e prome aniversario di e liña di telefon pa adultonan mayor na Club Kibrahacha na Piedra Plat.  Esaki tabata conoci como Proyecto 125.

   E liña aki, ta duna nos grandinan e oportunidad di por yama pa busca informacion, pa pidi yudansa, of pa combersa den caso di cualkier preocupacion. E number di e liña aki ta 125, y ta actualmente disponibel di 8 am – 12 pm. Mirando e necesidad di nos grandinan pa por ta constantemente den comunicacion, Gobierno a aloca fondo pa amplia e orarionan te cu atardi, y pa otro aña lo pone e liña aki disponibel tambe durante fin di siman.

   Prome Minister a indica cu e iniciativa aki a cuminsa durante e pandemia, na unda cu tur hende mester a distancia di otro. Mirando cu e adultonan mayor, como esnan mas vulnerabel e tempo ey pa contagia cu Covid a worde isola, a busca diferente manera pa toch famianan por a comunica cu nan sernan keri. Aki ta unda a bin cu e liña di telefon 125, cu awe tin un aña den funcion, na disposicion di nos grandinan.

  Señora Thaina Colina di Club Kibrahacha a duna un presentacion hopi interesante cuminsando pa splica con e Proyecto aki a bira realidad y a presenta e resultado di e prome aña di Telefon pa Adulto Mayor na unda cu tambe por a mustra e lokaal nobo di e Proyecto 125.

   Prome Minister ta felicita Minister Ursell Arends pa su dedicacion na nos grandinan, poniendo mas fondo disponibel, pa asina amplia e orarionan di operacion di e liña aki. Minister Arends tambe a hiba palabra na e ocacion. Tambe, ta felicita y gradici Club Kibrahacha y e 14 boluntarionan cu a bin ta eherciendo e trabao aki cu hopi amor.