Ley cu ta limita uso di productonan di tabaco lo drenta na vigor entrante dia 1 di januari 2022

The content originally appeared on: Diario

DVG — *Humador di cigaria, comercio y comunidad completo e oportunidad pa adapta na e ley nobo


ORANJESTAD (AAN): Recientemente Parlamento di Aruba a acorda e ley ‘beperking tabaksproducten’ cu ta un ley pa yuda regula y limita e uzo di productonan di tabaco particularmente e uzo di cigaria cu e meta pa a largo plaso eleva calidad di bida y tempo di bida.

Pa Salud Publico esaki ta un ley hopi importante, mirando cu uzo di cigaria ta dañino no solamente pa e usuario di cigaria cu ta rond di 12.6% di e populacion di Aruba riba 20 aña, pero tambe pa esnan cu ta biba of ta den cercania continuo di un of mas persona cu ta huma kende ta ser yama e ‘second hand smoker’. Estudionan a demostra cu uzo di cigaria ta hisa e risico di malesanan no transmiti manera cancer di pulmon, cancer di garganta, COPD, malesa di curazon, diabetes tipo- 2, obesidad y hopi mas pa cual motibo introduccion di e ley aki na Aruba tawata di gran importancia pa salud di nos pueblo.

E problematica di uzo di cigaria y su consecuencianan pa salud ta un problema mundial y diferente pais ta purba limita y regula esaki. Aruba conhuntamente cu Pan American Health Organization (PAHO) siguiendo e strategia ‘Best Buy’ di  WHO, na aña 2020 a traha un Plan National di Prevencion cu e meta pa reduci malesanan no transmiti (NCD’s) manera cancer, diabetes, presion halto, malesa di curazon, obesidad y mas.  Un punto hopi importante den e plan aki pa yuda den prevencion di NCD’s ta e introduccion di un ley pa regula y limita e uzo di cigaria.

  Awor cu e ley aki a keda aproba ta sigui e proceso di implementacion y supervision di e ley. E ley aki lo drenta na vigor entrante dia 1 di januari 2022 y lo conta cu un periodo di transicion pa duna usuario di cigaria, comercio y comunidad completo e oportunidad pa adapta na e ley nobo. Despues di e periodo di transicion e departamentonan cu lo bay ta encarga cu supervision di e ley lo cuminsa controla su implementacion y por duna sancion (boet) pa incumplimento si ta nesesario. Den e simannan cu ta sigui Departameto di Salud Publico lo sigui informa riba contenido, implementacion y supervision di e ley aki.

Cu aprobacion di e ley aki, salud publico ta logra dal un stap grandi den direccion di prevencion y un futuro mas saludabel.