Lema 2021: “Duna Sanger pa curazon di mundo sigui bati”

The content originally appeared on: Diario

ORANJESTAD (AAN) – Manera ta conoci, dia 14 di Juni di cada aña, ta worde celebra e Dia Mundial di e Donante di Sanger.


E obhetivo di e celebracion aki ta, pa trece concientizacion na henter mundo tocante e necesidad di dispone di sanger y productonan sanguineo sigur, pa transfusion.

   E contribucion di e donantenan di sanger boluntario (pues, no cu pago) ta crucial pa e sistemanan nacional di salud na henter mundo.

   Ademas, e dia aki ta ofrece un oportunidad na e gobiernonan y e autoridadnan di salud pa aporta e recursonan suficiente y establece sistemanan y infrastructuranan, cu por permiti aumenta e adkisicion di sanger for di donantenan boluntario.

   E sanger y e productonan di sanger sigur, mescos cu su transfusion, ta un aspecto di atencion fundamental, den e sistema di salud publico.

   Cada dia e donantenan di sanger ta scapa miyones di bida y ta logra mehora e salud y calidad di bida di hopi pashent.

   E necesidad di sanger ta universal, pero no tur esnan cu mester tin acceso na dje, y scarcedad mas halto di sanger, ta particularmente den e paisnan den desaroyo.

   Pa garantiza cu tur persona cu mester di sanger sigur por accede na dje, ta indispensable cu den tur pais tin donante boluntario y cu por duna regularmente.

   Durante e pandemia di Covid-19, apesar di e restriccionnan di movilidad y di otro dificultadnan, e donante di sanger den hopi pais, a continua aportando sanger y plasma pa pashentnan cu a, y ta, rekeri di transfusion.

   E esfuerzo extraordinario aki, realiza den e contexto di un crisis sin precedente, a pone di relieve e papel crucial di e donantenan di sanger bon organiza, y boluntariamente comprometi, pa salvaguardia e disponibilidad di suministro di saner sigur y suficiente, tanto den temponan di normalidad como di emergencia.

   ENFOKE 2021:  E lema di e Dia Mundial di Donante di Sanger ta: “Duna sanger pa curazon di mundo sigui bati”. E mensahe ta destaca e contribucion esencial di e donantenan di sanger, pa mantene e pulso di mundo, scapa bida y mehora e salud di e demas personanan.

Na mes momento, reforza e yamado mundial pa mas persona di henter mundo duna sanger regularmente y contribui na mehora e salud.

E campaña di e aña aki lo centraliza specialmente, den e papel di e hobennan pa garantiza un suministro di sanger sigura. Den hopi pais e hobennan a bin ta na vanguardia di actividadnan y iniciativanan, encamina na logra un suministro di sanger sigur y boluntario.

   META 2021:  Pa esaki nan kier gradici tur donante di sanger na henter mundo y genera mayor consenshi publico, pa loke ta trata e necesidad di conta cu donantenan boluntario, periodicamente.

   Promove e balornan comunitario di e donacion di sanger pa fortalece e solidaridad civico y la cohesion social.  Tambe promove e idea cerca mas hoben pa contesta e yamado humanitario di donacion di sanger y inspira otronan pa haci mescos.

   Tambe ta importante pa fomenta e posibilidadnan di e hobennan como socionan den e promocion di salud.