“Lantando un comunidad rond di e cultura di Rancho, e Curazon di Oranjestad”

The content originally appeared on: Diario

Lay Hing de Kort a splica riba e meta:  

ORANJESTAD (AAN) – Durante e conferencia di prensa di Fundacion Rancho, Lay Hing de Kort, di e compania Cornerstone Economics cu a prepara e rapport di e proyecto “Strategic Capacity Building Plan 2022-2026”, pa e fundacion, a hiba palabra.

Lay Hing a splica cu su funcion, como parti di e compania Cornerstone Economics, tabata pa facilita e Fundacion Rancho un “Strategic capacity building plan” cu ta encera cuater aña unda nan ta bay wak unda ta e buraconan y e necesidadnan di e fundacion, pa por cumpli cu e metanan cu nan tin nan dilanti.

Den e plan strategico aki, ta defini kico ta e prioridadnan cu e fundacion tin pa e siguiente cuater añanan, y tambe defini e detayenan di e mision.

Lay Hing a menciona cu Fundacion Rancho su enfoke ta pa conserva y proteha e cultura di e bario di Rancho, pero den esaki a bin ripara tambe cu e cultura su so no ta para na un manera individual, pero e tin areanan social-economico cu e ta influencia tambe, y ta door di esey, e plan aki tin diferente pilar, di cual ta wordo enfoca riba cinco di nan: 1. Sostenibilidad di e bario Rancho; 2. Educacion di su habitantenan; 3. Inclusion di cada un nan cultura;  4. Preservacion di e parti cultural, y 5. Partnership cu por bin pa por mehora e bario.

De Kort a subraya cu por mira aki cu no ta solamente e aspecto di cultura pero e ta un bista holistico. “Den e proceso aki nos a sinta hunto cu un grupo di e comunidad; esta, residentenan, boluntario di Rancho, y cu e staf tambe. Asina a bin traha un lista di trainings, inversionnan, y sistemanan di infrastructura cu mester bin pa logra locual ta nan mision, pa Rancho bira un bario mas sostenible cu ta forma e curazon di Oranjestad, miho conoci como Playa”, Lay Hing de Kort a conclui.