KPA ta bay eherce control pisa riba auto y establecimento den cuadro di e operacion ‘Iron Eagle’

The content originally appeared on: Diario

Alto Comisario Gordon:

ORANJESTAD (AAN):  Alto Comisario Interno Sra. Irma Gordon durante un conferencia di prensa diamars mainta a indica cu den fin di siman, cu e ‘Iron Eagle Program’ cu Cuerpo Policial hunto cu Ministerio di Husticia a lansa, tabata tin diferente control cu a tuma lugar pa e proximo lunanan indefini.

Alto Comisario Gordon a señala cu KPA ta bay eherce nan control riba entre otro auto y establecimento. Esnan cu ta stuur auto mester percura pa nan papelnan ta na ordo. E establecimentonan mester percura pa e security controla tur hende cu drenta nan establecimento. Zorg pa pafo tin un bon iluminacion y camaranan trahando, a remarca.

Tur  loke ta pafo di establecimento tambe lo wordo controla, Gordon a enfatisa.

Pa loke ta chauffeurnan, mester zorg pa e papelnan ta na ordo y tene na cuenta cu si bo ta bebe pa no stuur. “Si polis para bo coriendo bao di influencia di alcohol y bo a pasa 570 µg/l, bo por ta sigur sigur cu bo lo perde bo rijbewijs pa un temporada y tambe pa un periodo cortico bo ta cera tambe pa un periodo cortico te ora e alcohol sali for di bo curpa”.

A indica tambe cu si un chauffeur ta core bao di influencia di alcohol y ta ocasiona un dalmento cu final fatal pa tene na cuenta cu e posibilidad ey di wordo cera. Core auto bao di influencia tin consecuencianan su tras, a remarca.

Posesion di arma di candela den auto tin un castigo maximo di 4 aña. Ora cu Polis controla y haya un arma di candela den bo auto, bo por ta sigur cu bo lo bay cera y investigacion lo wordo sigui riba esaki, Alto Comisario a duna di conoce.

E proposito principal di e operacion aki  ta pa trece e sentimento di seguridad bek den comunidad y cerca e turistanan.

Durante di e weekend tabata tin un tiroteo atrobe cu arma ilegal envolvi y tambe tabata tin un entrada hudicial den becindario di un cas unda a confisca arma y droga.

Gordon a remarca cu e accionnan ta bay sigui y tur informacion cu KPA haya nan ta traha riba dje pa e seguridad aki di Aruba,