Knock out tecnico di Wever-Croes pa Reino

The content originally appeared on: Diario

Parlamento Hulandes lo interumpi vacacion pa atende cu Aruba? — *Bista di tur instancia di tur pais den Reino dirigi riba Aruba — *Fase transitorio di cinco aña pa cambio ta haci cu tur cos por pasa

ORANJESTAD(AAN)—Temporada di vacacion grandi a cuminsa pa Parlamentonan den Reino despues cu decision y accion di Gobierno Evelyn Wever-Croes a haci cu Augustus 2022 lo bira un luna di sumo importancia pa Reino Hulandes.

Siman pasa Gobierno Wever-Croes a laga tur pais di Reino asombra ora el a deshaci di e intentonan pa prome cu vacacion, Aruba lo a dicidi pa loke Hulanda kier pa futuro, sin tene na consideracion e resultadonan cu e lo tin na Aruba.
“Kico Hulanda ta bay haci?” a bira e pregunta grandi di expertonan riba tereno estatal den Reino.

Nan a indica cu e decision di Evelyn Wever-Croes pa dicidi pa un suma mas halto cu a spera pa entradanan di funcionarionan halto di Gobierno y companianan di Gobierno, a bira un sorpresa grandi.

Sumamente relevante tabata e hecho cu e fase transitorio pa yega na e suma estableci, a cambia di 2 pa 5 aña.

“Nos por papia aki di un technical knock out di parti di Prome Ministro Wever-Croes contra Hulanda ya cu hopi cambio den situacion local y internacional por presenta prome cu e fase transitorio yega na su fin,” informantenan a indica.

E desaroyonan di siman pasa, a trece un cambio den seno di expertonan y personanan directamente mara na gobernacion na e paisnan den Reino.

For di momento cu e debenan grandi di e paisnan Hulandes den region di Caribe a habri porta pa Hulanda drenta den accion, manera tabata e caso na 2014 na Aruba, e pensamento tabata cu sin mas e paisnan mester acepta loke Hulanda dicidi.

“Mester papia aki di un shock den loke a bira costumber for di momento cu supervision y ley di concenso a bira palabranan di dia,” informantenan clave a splica na DIARIO.

E suceso di siman pasa a wordo compara cu e momento cu na 1983, Aruba a haya su Status Aparte cu e formula di 1986 Status Aparte y 1996 independencia.

Aruba a duna prueba di ta un negociador pasobra na e momento, e team dirigi pa Betico Croes a alarga tempo cu Aruba tabata tin pa hunto cu Reino yega na un decision final pa Status Aparte, cu 10 aña.

Den e termino aki, Gobierno Nel Oduber a logra negocia eliminacion di fecha di independencia y Aruba a logra su proposito.

Informantenan a indica cu e momento a yega pa den Reino bin reforma financiero pa asina autonomia bira realidad pa e paisnan Hulandes den Caribe. Na mes momento mester deshaci di e pensamento eroneo cu Hulanda sin mas por dicidi pa e paisnan a base di “concensus wetgeving”, cu ainda mester demostra di tin e base pa por wordo considera aceptabel.

Hulanda kier a forsa Aruba tuma un decision financiero pa Aruba prome cu vacacion y a kere cu e por a forsa un decision di COHO tambe riba un tempo cortico y exigi Aruba acepta loke sefun RaFT Aruba mester haci.

Augustus ta bira un luna sumamente interesante awor cu Gobierno Evelyn Wever-Croes a enfrenta Hulanda cu a bini cu un lista di exigencia cu segun Gobierno Wever-Croes ta imposibel pa Aruba acepta ya cu e lo nifica cu ni Serlimar lo por scapa mientras cu Aruba realmente ta bira imposibel pa goberna.

E hecho cu Parlamento di Hulanda a bay cu vacacion den e tempo cu mester reacciona riba loke a pasa na Aruba, segun informantenan ta un indicacion sumamente importante.

Nan por kibra nan vacacion pa atende e situacion nobo awor cu e asina yama “norma Wever-Croes” a cambia na fabor di e funcionarionan di Gobierno y e tempo pa yega na e cambio final a wordo alarga.

Informantenan experto di Curacao y Sint Maarten ta indica cu e decisionnan di Gobierno Wever-Croes, por bira punto di salida pa e otro islanan tambe y cu ya den diferente seno na e islanan, e desaroyonan na Aruba ta wordo discuti.

COHO tambe ta spera final di vacacion y manera informantenan ta indica Augustus 2022 por bira sumamente interesante pa Reino.

Manera ta conoci Curacao y Sint Maarten a bay di acuerdo pa Mr. Evelyn Wever-Croes, bira e persona cu ta dirigi e proceso pa cambio di e concepto di COHO, loke ta nifica cu nan tin confiansa cu Prome Ministro di Aruba por alcansa resultadonan positivo pa Aruba, Curacao y Sint Maarten.