Kico ta pasa cu cas cu Benny a entrega contra ley?

The content originally appeared on: Diario

DIARIO ta sigui desaroyonan di casnan Colony pa hopi motibo — *Rapport Refineria di Aruba tambe ta papia di casnan Colony  — *Mas cu 370 Mil Florin di Pueblo a bay pa drecha Bungalow 71


ORANJESTAD (AAN) — Na momento cu Benny Sevinger a haci su entrada den politica pa bira back to back di Mike Eman, Aruba no a spera cu e ta haya su mes den tur problema cu a presenta.

Awe na forma historico Benny Sevinger ta representa Pueblo di Aruba, despues cu den prison el a scucha resultado di e eleccion na cual el a participa oficialmente cu gran sosten di su partido.

Ta cu gran interes DIARIO ta tuma nota di rapport tras di rapport y sentencia di Huez tras di sentencia di Huez, cu ta papia di ilegalidad cu a tuma lugar dor di Gobierno di AVP.

Nos mester cuminsa puntra nos mes kico ley ta nifica pa AVP, cu despues di eleccion a bay Huez pa pidi reconteo di voto cu prueba ilegal, cu contra ley, e tabata tin di formularionan pa voto secreto.

Te awe nada a pasa.

Cu nada a pasa na Aruba pa demasiado tempo, ta visto den e Rapport Bo Aruba y cantidad di rapportnan cu ta mira luz y ta haci hende puntra nan mes ki balor Ley tin pa e partido AVP.

Pa por yega e casnan di Colony, mester mira e refineria di Aruba, cu ta motibo pa cual e casnan a wordo traha.

Pa e refineria Gobierno Mike Eman a cera contracto contra Ley cu Citgo. Instancianan oficial a bisa esaki y nada a pasa.

Si Prome Ministro Wever-Croes no a bay exigi e yabinan di Citgo, te awe Aruba lo a keda rehen di e gangnan di Citgo y ainda hendenan manera Mike de Meza tin curashi di habri nan boca y papia di Citgo.

Den e rapport di Refineria di Aruba por haya un bista di e casnan di Colony, cu tambe a sirbi como oficinanan pa Refineria di Aruba.

Aki por tuma nota cu alrededor di 370 Mil Florin di Aruba a wordo gasta pa drecha un solo bungalow cu a keda atras bandona pa asina sirbi como oficina di Refineria di Aruba.

Awe e casnan di Colony ta den noticia atrobe pasobra Benny Sevinger contra ley a otorga cas na un persona na un forma contra orden publico, loke a haci cu Huez a declara e acuerdo entre e persona y Gobierno invalido.

Awor kico ta bay pasa? Kico ta socede?

Kico a pasa ora AVP a presenta cu prueba secreto cu nan a haya na forma ilegal dilanti Huez?

Kico a pasa cu e estado di derecho cu Aruba mester ta?

Unda respet ta keda pa nos leynan?

Palabra a caba na un pais democratico caminda berguensa ta yena Pueblo di Aruba cu hamas a pensa cu e lo topa cu resultadonan di gobernacion bergonsoso manera atrobe Gobierno di AVP ta produci.

Huez a bisa cu AVP a presenta documentonan di eleccion secreto cu segun ley no por ta den nan man.

Huez ta bisa cu Benny Sevinger a otorga un cas contra ley loke a haci cu e acuerdo a wordo declara nulo.

Awor kico ta pasa? Kico a resta di e estado di derecho Aruba?






: