Kibaima Total Services 50+ y Bambino’s Florsheim a titula campeon durante e campeonato 2017 di FLMSA

admin

ORANJESTRAD (AAN): Diadomingo 30 di juli 2017 bow di auspicio di Federacion Liga Mayor di Softball Arubano riba e tereno di Flatstone Ballpark na Piedra Plat tabata tin finalizacion di e di diescuatro campeonato di softball Liga Mayor pa locual ta trata partidonan den su fase Final y tambe partidonan Final di softball entre e teamnan di 60-plussers.

1º partido: Jani’s v/s Aruba Juniors Masters (60-plussers) 

Pa 10’or a duna inicio na e prome partido di dia entre e teamnan di 60-plussers den su parti final di Campeonato 2017 cu a bay entre Jani’s como equipo di cas enfrentando Aruba Juniors Masters como equipo visitante. E partido aki ta pa saca e tercer y cuatro puesto di e teamnan di 60-plussers. Den cabez di inning no. 1 Aruba Juniors Master ta sali brabo y nan ta score na 3 ocasion pa pone e partido 3 pa 0 na nan favor. Pero den bom di inning no. 2 ta Jani’s a reacciona barbaro y nan a score na 5 ocasion pa bolter e score 5 pa 3 na nan favor riba Aruba Juniors Master. Den cabez di inning no. 3 ta Aruba Juniors Master a score 2 careda pa empata e partido cu 5 careda pa banda. Den bom di inning no. 4 ta Jani’s a kibra e empate anotando 1 careda pa e partido bira 6 pa 5 na nan favor. Pero den cabez di inning no. 5 Aruba Juniors Master a bolbe empata e partido na 6 careda pa banda anotando 1 careda. Den bom di inning no. 5 ta Jani’s a score 1 careda y pa motibo di tempo reglamentario e partido a termina cu un victoria di 7 pa 6 na favor di Jani’s riba Aruba Juniors Master. Jani’s tabata 7 careda nan a bati 9 hit y a comete 3 error lriba tereno. Aruba Juniors Master tabata 6 careda nan a bati 9 hit y a comete 4 error riba tereno. Mihor bateador nan pa Jani’s tabata Mario Bomba y Wilfred Bomba tur dos di mil punto cu 2 hit den 2 turno. Mientras Franklin Fingal a bati 2 hit den 3 turno. Mihor bateador nan pa Aruba Juniors Master tabata Fabio Gei di mil punto cu 2 hit den 2 turno. Mientras J. Peguero y B. Guerrero ambos cu 2 hit den 3 turno. Pitcher ganador pa Jani’s tabata Mario Bomba cu a bay henter e ruta y e perdedor pa Aruba Juniors Master tabata B. Guerrero. Cu e victoria di Jani’s nan ta lora obtene e 3º puesto y Aruba Juniors Master ta logra e 4º puesto den e prome campeonato di 60-plussers bow di auspicio di Federacion Liga Mayor di Softball Arubano.

2º partido: Bambino’s Florsheim v/s Boomerang Ildo’s Lottery (60-plussers) 

Bambino’s Florsheim                  –        Campeon 60-plussers

Boomerang Ildo’s Lottery –        Sub-Campeon 60-plussers

Despues di e prome partido di dia a duna inicio na e di dos partido di dia cu tambe a bay entre e teamnan di 60-plussers esta Bambino’s Florsheim 60+ como team di cas enfrentando Boomerang Ildo’s Lottery como team visitante. E partido aki ta pa e titulo di campeon y sub-campeon di Campeonato 2017. Tabata den bom di inning no. 2 cu Bambino’s Florsheim 60+ ta score e prome careda di e partido. Pero den bom di inning no. 3 Bambino’s Florsheim 60+ a reacciona barbaro y nan ta score na 5 occasion pa pone e partido comoda mente na nan favor 6 pa 0 riba Boomerang Ildo’s Lottery. Den bom di inning no. 4 Bambino’s Florsheim 60+ a amplia e score cu un careda pa e partido bira 7 pa 0 na nan favor. Den cabez di inning no. 5 Boomerang Ildo’s Lottery a anota nan prome careda y e partido ta bira 7 pa 1 na favor di Bambino’s Florsheim 60+. Den bom di inning no. 5 Bambino’s Florsheim 60+ ta score 1 careda mas pa e partido bira 8 pa 1 na nan favor. Despues di 7 inning completo e partido a termina cu un victoria di 8 pa 1 pa Bambino’s Florsheim 60+ riba Boomerang Ildo’s Lottery. Bambino’s Florsheim tabata 8 careda, nan a bati 8 hit y nan a comete 1 error riba tereno. Boomerang Ildo’s Lotery tabata 1 careda nan a bati 5 hit y tabata eratico riba tereno cu 5 error cometi. Mihor bateador nan pa Bambino’s Florsheim tabata Juan Mathilda di mil punto cu 3 hit den 3 turno, mientras Aubrey Maduro tabata un bon dia tambe cu 2 hit den 3 turno. Pitcher ganador pa Bambino’s Florsheim 60+ tabata Willy Croes cu a bay henter e ruta, mientras Tony Warner tabata e perdedor pa Boomerang Ildo’s Lotery hanjando relevo di Sieg Albertsz den inning no. 4. Cu e Victoria aki Bambino’s Florsheim ta titula Campeon di 60-plussers den e Campeonato 2017 bow di auspicio di Federacion Liga Mayor di Softball Arubano. Mientras Boomerang Ildo’s Lottery ta bay cas cu e premio di sub-campeon di e 60-plussersnan.

3º partido: MPR/Deco’s Classics v/s Astros 

E di tres partido a inicia entre e equipo MPR/Deco’s Classics como equipo di cas enfrentando Astros como equipo visitante dunando inicio na e parti Final di Campeonato 2017 locual ta trata e clasificacion di e tercer y cuatro puesto di club miembronan afilia na Federacion Liga Mayor di Softbal Arubano. Ya den cabez di inning no. 1 Astros a anota nan prome careda. Ambos club miembronan su pitcher nan ta hala faha mara y ningun club miembronan a permiti otro di score careda. E partido te den bom di inning no. 6 tabata 1 pa 0 na favor di Astros riba MPR/Deco’s Classics. Ta den bom di inning No. 6 na unda cu MPR/Deco’s Classics a anota 1 careda pa empata e partido na 1 careda pa banda. Ningun di dos equiponan a score den inning no. 7. Despues di 7 inning completo e partido a keda empata na 1 careda pa banda. MPR/Deco’s Classics tabata 1 careda nan a bati 6 hit y nan a comete 5 error. Astros tabata 1 careda nan a bati 5 hit y a comete 1 error. Mihor bateador nan pa MPR/Deco’s Classics tabata A. Koolman cu 2 hit den 3 turno, mientras M. Thiel a bati 1 hit den 2 turno. Mihor bateador nan pa Astros tabata E. Colina, R. Martina, M. Loopstok y S. Flanegin tur cuater cu 1 hit den 3 turno. Despues cu ambos equipo/club miembro a tuma e decision pa bay over na lotmento pa saca un ganador y ta akinan e ganador a sali Astros cu ta clasifica na di e 3 lugar di e Campeonato 2017. MPR/Deco’s Classics ta termina na e di 4 puesto di e Campeonato 2017.

4º partido:  Kibaima Total Services v/s Balashi Sunrise Stingers                                              

Despues di e di tres partido a sigui cu e di cuater partido y ultimo partido di dia den su parti Final di Campeonato 2017, caminda Kibaima Total Services como team di cas a subi tereno pa enfrenta Balashi Sunrise Stingers como team visitante. E partido aki ta e titulo maximo di Campeonato 2017 bow di auspicio di Federacion Liga Mayor di Softball Arubano. Tabata den e cabez di inning no. 3 caminda cu Balashi Sunrise Stingers ta anota 2 careda pa pone e partido 2 pa 0 na nan favor riba Kibaima Total Services. Den bom di inning no. 4 ta Kibaima Total Services a corta ventaja anotando 1 careda. E partido ta bira 2 pa 1 na favor di Balashi Sunrise Stingers. Ambos pitcher a contende e equiponan na minimal anota careda, pero ta den bom di inning no. 6 caminda cu Kibaima Total Services ta reacciona brabo y nan a score na 5 ocasion pa bolter e score y bay dilanti cu e score di 6 pa 2 na nan favor. Den cabez di inning no. 7 Balashi Sunrise Stingers no a anota careda y e partido despues di 7 inning a termina cu un victoria di 6 pa 2 pa Kibaima Total Services riba Balashi Sunrise Stingers.

Kibaima Total Services     –        Campeon 50-plussers

Balashi Sunrise Stingers    –        Sub-Campeon 50-plussers 

Kibaima Total Services tabata 6 careda nan a bati 8 hit y nan a comete 2 error. Balashi Sunrise Stingers tabata 2 careda, nan a bati 7 y a comete 1 error. Mihor bateador nan pa Kibaima Total Services tabata Anselmo Orman y Emilio Loefstop ambos di mil punto cu 1 hit den 1 turno. Robert Henriquez tambe a bati 2 hit den 3 turno. Mihor bateador nan pa Balashi Sunrise Stingers tabata Michael Albus, Ray Mathilda y Kenny Solognier tur tres cu 1 hit den 2 turno. Pitcher ganador pa Kibaima Total Services tabata Mark Simon cu a bay full e ruta, mientras Gregory Paulina tabata e pitcher perdedor hayando relevo di Lucas Wever den inning no. 6.

Asina Federacion Liga Mayor di Softball Arubano por waak atras riba un bon diadomingo  di campeonato no. 14 (2017) cu culminacion di e campeonato 2017 den su parti Final caminda tremendo partidonan di softball, na unda club miembronan a sigui brinda bon partidonan di softball. Tabatin un tremendo ambiente di softball caminda DJ Hubert Geerman a sa di deleita e publico presente.

E bar tabata na encargo di directiva di Federacion Liga Mayor di Softball Arubano y a sa di brinda e publico presente. E cushina twt na encargo di e damas nan di Benjamin Tigers 60+ y a duna un tremendo servicio. Un danki ta bay pa e cuerpo di umpires bow di direccion di Sr. Mito van der Biezen. Tambe danki ta bay pa nos scorer di ful campeonato 2017 – Sra Mila Dirksz.

Pa 6’or y mei e trofeonan corespondiente a wordu entrega di e siguiente forma:

Campion pitcher                :           Tico Loefstop – MPR/Deco’s Classics

Campion batter                 :           Robertico Boekhoudt – Balashi Sunrise Stingers

Campion homerun             :           Roland Kemp – Kibaima Total Services

MVP                                 :           Mark Simon – Kibaima Total Services

                  50-plussers:                                                     60-plussers:

Campion 2017:      Kibaima Total Services           Campion 2017:            Bambino’s Florsheim 60+

Sub-campion:        Balashi Sunrise Stingers          Sub-campion:              Boomerang Ildo’s Lotery

3º lugar:                 Astros                                      3º lugar:                       Jani’s Heavy Equipment

4º lugar:                 MPR/Deco’s Classics              4º lugar:                       Aruba Juniors Master

Terminando cu un saludo deportivo na tur club miembronan cu a carga e campeonato 2017 y sperando riba cobertura pa e ultimo edicion pa cu nos campeonato 2017. Un danki grandi na tur nos representantenan di prensa pa cu nan apoyo durante henter nos campeonato.

Next Post

Pionero den Turismo Raymond Maduro ta subi lista di POR

ORANJESTAD     (AAN):    Plataforma Pueblo Orguyoso y Respeta (POR) tin e grato placer pa confirma lansamento di sr. Raymond Maduro riba lista di POR pa e proximo eleccion. E Forsa Nobo a mustra desde principio cu e lista e la forma, ta basa riba balornan principal cu ta e punto di […]