Kia Rio horta laga atras na Koyari a start usando simple waya di USB

The content originally appeared on: Diario

E asina yama Kia Boys y e TikTok Challenge


Hopi Kia Rio ta sigui wordo horta cu USB
Autonan marca Hyundai tambe ta core riesgo 

ORANJESTAD (AAN): Desde 2023 caba DIARIO ta adverti riba esaki. Den ultimo temponan, Cuerpo Policial Aruba a constata cu tin basta hortamento of intento pa horta autonan specialmente marca Kia modelo Rio y esey DIARIO tambe a bolbe trece dilanti tambe.

   Polisnan a tuma nota tambe cu malechornan ta purba di horta e Kia modelo Sportage como tambe Kia modelo Picanto purbando e mesun Modus Operandi.    Esaki ta un fenomeno cu a cuminsa na Aruba ora grupo di hobennan a cuminsa haci e “TikTok challenge”.    Door di uza un screwdriver y un USB cable charger di telefoon, ladron por drenta y den apenas 30 seconde ya nan ta hinca e USB cable den e parti di ignition switch desarma y start e auto encuestion.

   Recien tambe departamento di Team Motorvoertuigen Criminaliteit (TMC) a cuminsa concientiza esnan cu tin e auto menciona pa pone mas atencion y precaucion pa evita cu e auto ta worde horta.  Como cu ni Hyundai ni tampoco Kia no kier recall e autonan aki, ta keda awor na e doñonan di e autonan por preveni door di pone alarma of tambe klem/lock di stuurwiel.

   Polis tin atencion pa cu e fenomeno aki y ta avisa pa tur persona cu tin pensa di haci esaki, cu bo chens ta grandi di worde gara y deteni como consecuencia cu bo lo hayabo ta bay cera. Corda esaki ta un delito y tin castigo riba dje.    Mayornan di e sospechosonan menor di edad mester corda cu nan ta por worde pone responsabel pa e gastonan di e daño haci na e auto como tambe daño na tercero.    Mayornan papia cu boso yiunan y splica nan e consecuencia cu e “TikTok challenge” tin. NO ta solamente e yiunan ta bay cera, pero abo como mayor ta worde poni responsabel pa tur gasto envolvi!

   Origen di e problema: Tabata na final di aña 2022 cu ya caba DIARIO a cuminsa raporta riba e peligro di e “Kia Challenge” aki principalmente na Merca y Canada, unda gruponan di hobennan yamando nan mes ‘Kia Boys’ tabata djis usando cualkier waya Type-A di USB Cable bo por start cierto vehiculonan Kia y tambe Hyundai cune.

   Tur esaki debi cu Kia y Hyundai kier a “spaar placa” ora di fabrica cierto autonan entre aña 2015 y 2021 y no a instala loke ingenieronan ta yama ‘immobilizers’.  Esaki ta sistemanan cu na Aruba ya caba tabatin autonan di otro marca ta wordo bendi como 30 aña pasa caba.  Ta autonan cu ekipo electronico di seguridad, cu ta evita cu e motor ta start si acaso bo no tin un yabi corecto poni.

   E yabinan aki tin un microchip den dje (un tipo di ‘transponder’) cu ta comunica cu e auto, y e ora numa e motor por start.  Autonan di diferente marca tabata pone esaki standard den añanan 2000 en adelante.

   Caso nobo na Aruba: Diadomingo marduga banda di 3:50 am, unidad di Polis di Noord coriendo den area di Koyari, a bin topa cu un auto Kia Rio blanco cu a wordo horta poco prome for di un cas na Sabana Liber.

   E ciudadano di inicial R. a entrega keho di ladronicia di un Kia Rio color blanco.  El a splica cu banda di 2:20 am el a laga su auto na lock y intacto para pafo dilanti su cas.  Banda di 3:30 am, su cachonan a cuminsa ladra y ora el a bay pafo el a ripara cu ladron a bay cu e auto caba.  Algun ciudadano eybanda cu ta forma parti di Neighborhood Watch, tin security video und abo ta mira 4 sospechoso rond di su auto.

   E autonan modelo Kia ey ta facil pa horta nan, ta djis un waya di USB cable bo mester, y tambe un screwdriver, y den menos di 30 seconde e autonan ta start sin problema.  Tin hende cu ta cende esaki den apenas 12 seconde.

   Na Koyari, Polis a haya e auto tabata riba pida caminda di santo.  Polis a baha y mira cu e bentana patras banda drechi ta kibra.  Nan a mira con e capa na e stuurwiel y e ignition switch a wordo kibra, y tin un waya di USB poni keto bay den e switch.

   Pues ladronnan aki cu djis un USB Cable a start e auto y horte.  Despues a djis lage atras na Koyari.

   Polis a laga e waya USB keto bay den e switch y a yama Takelwagen como cu nan a confisca e auto.  E auto a wordo hiba pa Warda di Santa Cruz pa mas investigacion.