Jairo Maduro di Partido POR ta opina cu abuso di menor no ta cos di haci politica cune

admin

ORANJESTAD (AAN): Segun Jairo Maduro di Partido POR, ultimo dianan por constata cu tin diferente candidato riba lista politico cu ta haci uzo di e tema di abuso di menor. Pakico te awor?

E tema aki realmente ta delicado y e ta un trauma di e victima y su famia, pa tal motibo mes e no ta algo pa haci politica cu ne.

Segun Maduro, e ta presidente di e fundacion Stop Abuso di Menor Aruba y nan a lucha hunto cu tur boluntario dia aden y dia afo pa cana e caminda corecto pa por concientiza nos gobernantenan y pueblo en general pa por preveni abuso di menor.

Den mi caso e uzo di e tema den mi programa di campaña ta diferente pasobra hopi prome cu mi a pensa pa forma parti di un partido politico, mi persona hunto cu boluntarionan a recolecta 8.940 firma contra abuso di menor y nos a entrega esaki na presidente di Parlamento. Den e epoca ey ningun miembro di Parlamento y tampoco ningun politico no a aporta nos campaña cu ni sikiera un firma di apoyo. Pakico awor si kier papia di e tema ?

Mi persona a tuma iniciativa pa haci investigacion na diferente instancia y departamentonan concerni. Tambe mi a haya por escrito y scucha testimonio di diferente victimanan y famianan completo sufriendo te ainda a causa di maltrato y abuso sexual pasobra nunca nan no a haya ayudo of respaldo di husticia, di gobierno y tampoco di ningun instancia.

Tambe p.e. mi a papia cu diferente miembro di Cuerpo Policial Aruba cu pa falta di materialnan nan no por eherce nan trabao manera debe ser.

Mi a haci esakinan pa asina tin mas conocemento riba e tema tan delicado aki y tambe pa por a siña conclui p.e. kico tur falta den nos leynan vigente pa e por traha mas practico y eficiente.

A base di tur e informacion concreto for di e dialogo y investigacion cu nos a compila nos a entrega un manifiesto na presidente di parlamento Mervin Wyatt Ras varios luna pasa. Nos a keda cu e speranza cu e presidente di parlamento sikiera lo por a convoca un reunion pa dialoga riba un di e puntonan den e manifiesto.

Lamentablemente apesar di tur esfuerso di mi persona hunto cu nos boluntarionan pa defende nos menornan esaki te awe no a tuma lugar.

Danki na Dios cu aunke mi persona ni tampoco ningun miembro di mi famia no ta victima di abuso sexual, mi a dicidi di tuma e iniciativa pa lucha contra abuso di menor prome cu e bati na porta di un di mi ser kerinan. E iniciativa aki mi a tume y hacie di curason pa di un manera of otro lucha pa preveni abuso di menor y pa concientiza e pueblo di Aruba cu e problema of mihor bisa e epidemia aki ta hopi mas grave di loke nos tur ta pensa of imagina.

Pero atrobe esaki ta un tema di menos importancia pa personanan cu nunca a pasa den dje of pa esnan cu ta pensa cu nunca nan lo pasa den dje.

Desde februari e aña aki mi a worde acerca door di diferente partido politico pa postula mi persona como candidato riba nan lista. Cu excepcion di e partido POR, tur otro partido cu a acerca mi persona tabata mas interesa den 8940 firma cu nos a recolecta y no cu e causa riba su mes. Siendo cu POR a acerca mi pa mi sigui lucha pa e causa contra abuso di menor paso e ta parti di nan plan di accion.

Mi persona no a tuma e decision pa postula mi mes riba lista di POR pa hunga politica cu e causa, sino mas bien pa mi sigui cu e lucha cu nos a bin ta haciendo como defensor di nos menornan pa asina e peticionan y e rapportnan no keda hinca den lachi pasobra nos mester sigui traha riba e cambionan necesario y ehecutanan den tur su aspecto preventivo y represivo pa por preveni abuso di menor.

Banda di cambia leynan pa introduci castigo minimo den un forma proporcional, tambe mester traha leynan mas practico y eficiente como medio necesario pa KPA, Ministerio Publico y nos huesnan por eherce nan trabao mihor. Introduciendo e castigo minimo unicamente, no ta e solucion pa e problematica aki.

Mester crea fondo pa nos instancia y departamentonan por introduci programa efectivo pa rehabilita y sostene e victima, su famia y tur esnan envolvi den e tragedia y trauma di un abuso di menor den ki forma cu e presenta.

Nos kier institui y ehecuta un plan di conscientisacion y educacion den diferente forma cu ta posibel riba un plataforma nacional. Nos kier usa methodonan y medionan preventivo cu a demostra a base di resultadonan positivo pa preveni cualkier tipo di abuso contra nos menornan, manera organizacion e.o. Stop it now!, Meld Kinderporno op Internet, Expertisebureau Online Kindermisbruik (EOKM).

Esaki ta necesario pa preveni prome cu e persona comete e delito y tambe un programa pa rehabilita y reintegra un pedofil, efebofil, pedosexual y efebosexual, despues cu e comete e delito.

Traha cupo di trabao necesario pa nos studiantenan cu na final di nan estudio lo ta e expertonan mañan y cu nos tin mester di nan experticio. Pa un siguiente stap y riba un ​nivel mas halto nos tin cu dialoga cu Reino Hulandes pa institui un TBS kliniek sea na Aruba, Boneiro, Saba, Sint. Eustatius of Curaçao, pa e pedofil, efebofil, pedosexual y efebosexual cu no por funciona mas den nos comunidad segun conseho di nos expertonan, pa proteccion di nos comunidad.

 

Next Post

Banco Central a dicidi na mantene e porcentahe actual di e tasa di reserva

ORANJESTAD (AAN): Durante e reunion di dia 4 di Mei 2017 e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a […]