Inversionistanan cu ta yuda engrandece comercio na Aruba no mester wordo persegui door di DIMAS

The content originally appeared on: Diario

Gobierno mester actua cu man duro pa elimina ‘red tape’


ORANJESTAD (AAN):  Un inversionista cu tin varios aña na Aruba a indica na DIARIO cu e ta pasando den un caminda di cruz pa cinco aña caba cu DIMAS. Ta mustra cu DIMAS ta yuda solamente esnan cu nan kier yuda y no hende decente cu ta bin inverti na Aruba y asina yuda engrandece comercio y duna oportunidad pa trabao na varios hende local mes. A yega ora pa elimina e ‘red tape’ na inversionistanan y no persegui nan manera cacho.

            E doño di negoshi a expresa cu nan ta hende serio, cu ta stima Aruba y a bandona nan pais prome cu henter e situacion di Chavez na Venezuela. Nan a cumpra un cas na Tierra del Sol y dicidi di inverti y habri un negoshi, pero nunca nan a pensa cu nan lo pasa den tanto dificultad y hasta humiliacion na Aruba. E señora ta conta cu e tin hopi miedo di hasta sali for di su cas, pasobra e ta sinti su mes persigui.

            DIMAS a bira un cuchio di dos banda y ta causando un desastre pa comercio. Nan mester bira mas transparente y esnan cu ta aplica pa permiso, mester por haya contesta di biaha, sin sinti nan mester ‘secuestra’ door di DIMAS.

            Si Gobierno elimina tanto ‘red tape’ y burocracia den DIMAS, haci e sistema mas dinamico y facil, sigur esaki ta bira mas atractivo pa inversionistanan por habri negoshinan na Aruba, consecuentemente comercio lo bira mas grandi y diversifica, y lo habri mas puesto di trabao.

            DIMAS ta core cu esnan cu kier inverti na Aruba! Si cualkier comerciante ta haya nan mes ‘lora y hera’ choca den e ‘red tape’ di DIMAS, ta cu cua gana nan lo habri nan negoshi? Nan lo dicidi di inverti otro caminda, pero como nan ta stima Aruba, nan ta cumpli cu tur rekisito y ley pa haya nan debido permisonan.

            Gobierno no por tolera esaki mas y mester haci un ‘overhaul’ den DIMAS pa elimina tur e bagamunderia cu ta pasa eyden.  Esnan cu kier inverti na Aruba no mester bira victima di un sistema ineficiente, cu ta traha na “kier” di hende.

            Den situacion economico aki, mester acelera desaroyo economico y no laga e inversionistanan hoga den burocracia.