Inclusion financiero ta necesario pa desaroyo di Aruba

The content originally appeared on: Diario

Minister Geoffrey Wever mustrando cu:

*Acceso y uso di servicionan financiero ta relativamente halto na Aruba 

ORANJESTAD (AAN):  Riba 29 di november durante  e evento inaugural di Foro di Pago Nacional, Minister Geoffrey Wever a elabora riba e importancia di acceso na  y uzo di servicionan financiero manera un cuenta bancario y di spaar pa nos ciudadanonan y companianan.

            Foro di Pago Nacional, un iniciativa di Banco Central di Aruba ta un plataforma consultativo entre sector priva y publico cu tin como meta stimula e dialogo riba temanan relata na e sistema di pago.

            Acceso na y uzo di servicionan financiero of inclusion financiero ta parti di e maneho economico di Ministerio di Asuntonan Economico, Comunicacion y Desaroyo Sostenibel. Diferente publicacion di Banco Central di Aruba ta mustra cu aunke e acceso y uso di servicionan financiero ta relativamente halto na Aruba tin espacio pa stimula esaki cu lo trece mas beneficio pa desaroyo economico di Aruba.

            Como parti di su maneho economico Minister Geoffrey Wever a elabora riba diferente iniciativanan pa stimula acceso na  y uzo di servicionan financiero. Pa proteha consumidornan di entre otro interes halto pa credito, e ley regeling consumentenkrediet a drenta na vigor riba 16 di juni 2022. Actualmente ta den proceso pa determina e taza di interes pa creditonan di consumo.

            Pa garantiza cu tur ciudadanonan y companianan tin un cuenta basico bancario di pago, e Lansverorderening Basisbetaalrekening ta den preparacion.

            Educacion financiero tambe ta prioridad di maneho pa stimula acceso na y uzo di servicionan financiero. Pa stimula e conocemento financiero riba budgeting, spaar, inverti y debe personal, Minister Geoffrey Wever a elabora riba e proyecto Finansa den mi Hogar. E prome edicion di e proyecto Finansa den mi Hogar a start den 2022, a wordo ofreci gratis den tur districto y a termina diamars ultimo den districto di Santa Cruz. Mas cu 300 ciudadano a participa na e curso Finansa den mi Hogar. E di dos edicion di e curso Finansa den mi Hogar lo continua den 2024.

            Den 2024 Ministerio di Asuntonan Economico lo continua cu implementacion di diferente proyectonan nobo pa stimula inclusion financiero cu ta acceso na y uzo di servicionan financiero door di nos ciudadanonan y companianan manera entre otro un cuenta bancario y cuenta pa spaar.

            Minister Geoffrey Wever ta felicita Banco Central di Aruba pa e tremendo iniciativa di organisa e Foro di Pago Nacional.