Incidente di diadomingo atrobe ta e muestra di e retonan grandi cu Aruba ta enfrenta pa loke ta trata KIA

The content originally appeared on: Diario

Minister Rocco Tjon: — *A captura e tres presonan fugitivo den un tempo record

ORANJESTAD  (AAN)- Dialuna mainta, durante un conferencia di prensa di Gobierno di Aruba, Minister di Husticia y Asuntonan Social Sr. Rocco Tjon, a toca brevemente e parti di e incidente cu a tuma luga na  Instituto Coreccional Nacional esta; KIA. 

            For di e momento cu e incidente a sosode, Minister Tjon ta den contacto cu leiding di e instituto, pa asina delinea e maneho y e procedura cu ta sigui.

            Manera ta conoci, diadomingo tres preso a purba di huy for di nos instituto coreccional, pero a wordo gara mesora. Di forma inmediato, a ricibi e reportahe pa loke ta e incidente aki for di e director di KIA como tambe e director di CEA.

            Dialuna mainta a bolbe reuni cu ambos director, caminda a keda conclui cu e captura aki tawata e resultado di e bon colaboracion entre e tres departamentonan, esta KIA, CEA Y Cuerpo Policial pero tambe e procesonan cu ta hopi bon alinea na otro. A logra wak diferente titular den un tempo record, caminda a logra gara e tres presonan aki.

            E incidente aki ta, un bes mas, e muestra di e retonan grandi cu Aruba ta enfrenta pa loke ta trata nos instituto coreccional. No solamente e parti infrastructural y e parti di material, pero di un banda tambe adaptacionnan legislativo cu lo mester tuma luga. Na mes momento, e mandatario a splica cu, ex-minister di husticia Sr. Bikker ya caba tabata tin un concepto di ley entrega na DWJZ, pa asina percura cu e hecho cu un persona ta trata di huy for di KIA, por ta uno castigabel pa ley y cu un “strafmaat” basta halto. Na e momentonan aki ta en espera di e contesta di directie wetgeving pa e concepto di ley aki por bay wordo trata den parlamento.

            Ministerio di Husticia y Asuntonan Social lo manda un carta pa Hulanda un bes mas, pa bolbe accentua e importancia di por yega na un instituto coreccional nobo. Esaki ta importante, pa motibo cu manera ta conoci, mirando e magnitud di e proyecto aki lo mester tin permiso di Hulanda pa por adkiri e fondonan necesario pa por financia un proyecto asina. No obstante tur e retonan aki, lo keda adapta procesonan pa por keda garantisa siguridad na nos instituto coreccional, como tambe e siguridad di e personal y e detenidonan, mirando cu e ta un responsabilidad cu pais Aruba tin.

            Pa termina, e mandatario a manda palabranan di elogio un bes mas pa e tremendo trabou y cooperacion cu tabata tin entre e trahadonan di KIA, CEA y Cuerpo Policial, cual hunto a captura e tres presonan aki den un tempo record.