Husticia mester actua den caso difamacion Wever-Croes!

The content originally appeared on: Diario

Como prome dama cu a dirigi corant na Antia Hulandes mi ta conclui — *Como ex politico mi conoce e wega y abuso di cuero di olifanti — *No por papia di matansa na Ukraine sin mira abusador na Aruba

ORANJESTAD (AAN) — Awe mi ta pidi lectornan di DIARIO permiti mi, skirbi e columna aki cu titulo personal, aunke e contenido ta wordo carga dor di DIARIO loke ta importante den cuadro di leynan na Aruba cu ta regla e base legal di ehecucion di libertad di palabra.

Semper DIARIO a indica cu tin ya tin ley cu ta dicidi na kico periodistanan mester atene nan mes y cual ta e interes cu nan mester sirbi den nan trabou.

Ta pasobra tin e leynan aki tin Hefe di Redaccion, cu mester percura pa cumplimento di e base legal di periodismo na Aruba, cu no ta permiti pa hende wordo destrui a base di destruccion di Libertad di Prensa.

For di 1975 mi ta conoci cu periodismo na Aruba despues cu mi a scoge pa acepta un oferta pa bandona e puesto cu mi tabata ocupa y cu lo a garantisa mi un bida trankil na mi pais natal Curacao, caminda e tempo tur corant cu tambe Aruba tabata conoce, tabata wordo imprimi.

Mi entrada den periodismo tabata marca e momento cu na Curacao mi a wordo confronta pa prome bez den mi bida, cu pobresa absoluto scondi, na e isla. Esaki a resulta den e hecho cu mi a manda un remitido pa e corant Beurs-en Nieuwsberichten den cual mi a cuestiona presencia di hamber na Curacao.

Resultado tabata cu mi a wordo pidi pa uni mi mes na e corant di cual mi a bira Hefe di Redaccion adhunto y asina tambe parti di periodismo cu ta cubri Aruba y despues di otro corantnan cu mi a dirgi, bira prome Hefe di Redaccion di DIARIO.

Central den periodismo ta e ser humano. E dignidad di e ser humano cu awe ta na disputa na Ukraine pero tambe na Aruba.

Hamas mi a pensa cu na Aruba, periodismo por a alcansa un nivel asina abou, cu hende cu ta uza e nomber di periodismo, por comete atraco riba dignidad humano di un persona.

Como ex politico y un tempo Miembro di Conseho Insular di Curacao, mi sa kico abuso di persecucion politico ta nifica y con semper por sconde tras di e ridiculez cu politiconan mester tin cuero di olifanti.

Abuso sin nomber a wordo haci di un dama, Prome Ministro Evelyn Wever-Croes y awe na mi parecer, cu mi experencia di periodismo, mi mester conclui cu Husticia tin e deber pa actua contra publicacionnan.

Den mi carera como Hefe di Redaccion, mi tin prueba cu Husticia sin keho, por actua ora prensa abusa di su poder y pone bienestar general of di un persona, na peligro.

Integridad y e balor di hende a haci cu mi a laga un carera internacional atras pa mi bira Hefe di Redaccion cu aporte internacional di nivelnan mas halto cu un comunidad conoce.

Tur hende cu a atende cu mi na Aruba for di 1975 ta conciente, cu balor di hende, tabata tin e posicion mas halto den mi bandera y con esaki a uni mi persona na e lucha di DIARIO, e lucha di Jossy Mansur pa dignidad di hende, di e Arubiano.

Awe mi ta keda fiel na mi entrada den periodismo y ta repudia loke ta pasa cu Prome Ministro Wever-Croes.

Mi ta puntra tur homber na Aruba, con nan lo a reacciona si nan a mira cara di nan esposo na curpa di prostituta cu ta haci sex?

Mucha no por mira e porkeria cu hende cu ta yama nan mes miembro di Prensa a produci.

Aruba ta pais di hende drechi. Ora mi mira e pornografia contra ley, mi ta puntra mi mes si tin ciudadano cu por a bira victima di e tactica awe.

Awe no ta asunto ki color politico Prome Ministro Wever-Croes tin ni cual politico lo kier sinta na su lugar.

Dignidad di hende cu Gobierno, Husticia, Parlamento y tur hende mester sirbi como e balor mas grandi di hende, ta na peligro.

Como invitado di State Department di Merca, mi a cera conoci cu loke ley ta encera pa proteccion di e ser humano contra loke a pasa na Aruba y cu ta contra Constitucion di Reino, Constitucion di Aruba.

Democracia ta na peligro dor di terorismo, cu awe Sociedad Interamericano di Prensa kier sostene cu acusacion contra Aruba y Prome Ministro.

Mi no mester di bendicion di SIP, cu a faya despues di un acusacion di un periodista cu awe mi kier puntra si e porkeria produci pa Andrade y Paskel por wordo yama periodismo.

Palabra ta na Husticia, cu mester proteha Aruba contra terorismo di periodismo cu mester sirbi dignidad di hende y no interesnan scondi peligroso!