Hulanda ta mira finanzas pero ta cera wowo pa corupcion

admin

Parlamentario mr. Juan Ady Thijsen:

ady3ORANJESTAD (AAN): Segun Ady Thijsen di MEP, Hulanda a mustra di ta preocupa cu e situacion na Aruba pa locual ta toca e situacion financiero. For di debatenan den Tweede kamer ta sali afor cu e preocupacion ta hopi basa riba e miedo cu e pagador di belasting na Hulanda lo paga na final di cuenta e debe di Aruba.

E preocupacion aki a culmina awor cu aceptacion di Aruba di supervision financiero atravez di CAFT. Segun parlamentario mr. Juan Ady Thijsen Hulanda ta cera wowo pa otro componentenan di mal gobernacion (onbehoorlijk bestuur). Asina porehemplo Hulanda a cera wowo den caso di Kico Gomez. Ta mas cu logico cu un mandatario cu ta anda cu criminalnan mester duna aclaracion na su parlamento.

Den e caso aki Prome Ministro y lider di AVP ta nenga di duna aclaracion na parlamento di Aruba. Hulanda tambe por a yama Mike Eman ” op het matje” pero Hulanda a haci mescos cu su ” neus ta bloedt” y es mas Hulanda ta permiti Mike Eman papia den nomber den Reinado Hulandes hasta den UN.

Tambe Hulanda mester ta na altura di e varios casonan di corrupcion di Gabinetenan di Mike Eman pero Hulanda no ta ni hik lubando cu corrupcion tambe ta forma parti di onbehoorlijk bestuur pa cual Reinado ta para waarborg pe.

Segun Thijsen, tur hende por corda cu pa redo Hulanda a laga haci un WODC rapport pero awor cu casonan pisa Hulanda no tende, mira y bisa nada.

Segun mr. Juan Ady Thijsen e actitud di Hulanda pa cu AVP ta hopi cuestionable y ta haci Hulanda complice di tur maldad di AVP.

 

Next Post

Banco Central tambe ta preocupa cu e financial transaction tax

Evelyn Wever-Croes mustrando riba Medida #9 ORANJESTAD (AAN): Lider di MEP y fraccion di MEP a reuni cu Banco Central diahuebs ultimo pa haya un mihor bista di e situacion financiero di pais Aruba. Varios aspecto a worde splica. Entre e puntonan discuti ta e preocupacion di Banco Central cu […]