Hulanda por inventa un formula pa yega na un Gobierno

The content originally appeared on: Diario

NATO a pone Mark Rutte riba lista di espera como dirigente


Informador Putters hopi cuidadoso den un fase interesante
Politiconan Hulandes mester dicidi kico ta “extra Parlamentario” 

ORANJESTAD (AAN) Segun informacionnan cu ta wordo lanza den medionan di comunicacion Hulandes, lo ta un cuestion di tempo pa Hulanda yega na un Gobierno nobo.

   Informador Putters ta sumamente cuidadoso den uzo di palabranan pa describi kico ta pasa cu su intentonan pa forma un Gobierno Hulandes cu sigur ta marca historia prome cu e existi.

   Formacion di un Gobierno por ta un tarea sumamente dificil, pero e trabounan di Informador Putters, cu a reemplaza formador Plasterk, cu a logra baha Mike Eman for di Fort Zoutman pero no por a logra forma un Gobierno pa Hulanda, ta bisa hopi.

   E noticia concreto cu por a wordo duna ayera tabata cu e partidonan cu ya a sinta cu otro na mesa y tabata tin e base pa forma un Gobierno, cu segun nan na cierto momento no tabata posibel mas, a dicidi cu nan ta sigui papia.

   Esaki ta e unico informacion real cu Informador Putters a dicidi cu e por duna pa asina mantene un posicion cu no ta causa problema pa su persona, si no logra forma un Gobierno.

   Aparentemente e cuatro partidonan cu por forma un Gobierno di mayoria, lo a topa cu otro den e intento pa bolbe sinta na mesa, pero kico nan kier logra, no ta mucho cla ni pa e propio Informador, si mira cu e no kier duna ningun informacion cu ta mara su persona na un resultado concreto.

E noticianan cu ta alcansa tur parti di Reino tampoco ta duna e informacion cu por spera sigur di tene na cuenta cu ta wordo papia di un Gobierno segun un formula, cu ainda mester wordo inventa dor di e partidonan cu kier yega na un coalicion.

E hecho cu e controversial Geert Wilders lo mester bira Ministro Presidente, ta e punto di discordia segun tur publicidad.

Loke realmente a crea problema pa formacion durante e intentonan di Plasterk tabata simplemente e cantidad di problema cu e Gobierno nobo di Hulanda mester soluciona, cu ta cuminsa cu decisionnan si ta sigui saca gas for di Noordzee y con ta haya mas placa pa cubri tur e gastonan cu Reino tin cu cambio di clima, cu defensa, cu mehoracion di e situacion social di e Hulandes, cu a cansa di paga belasting na e pais mas rico na mundo, sin cu e Hulandes mes por yama su mes rico debi na e forma cu e mester paga belastingnan y gastonan di gobernacion.

Promesanan cu a wordo haci den tempo di eleccion, sigur ta haci formacion di un Gobierno nobo dificil ya cu e politiconan mester dicidi di baha for di nan nubianan prome cu nan por yega na un gobernacion.

Ayera nochi e noticia grandi tabata pues, cu e cuatro partidonan ta bolbe na mesa segun e Informador, cu no a duna comentario oficial si e ta logra yega na un Gobierno nobo, cu segun tur informacion (cu a nace na un forma of otro na Hulanda), e pais lo conoce un Gobierno basa riba un formula cu ainda mester inventa pasobra e no ta existi den Reino, pues un Gobierno extra Parlamentario.

Aki ta caminda e rabo di porco ta krul pa Aruba tambe cu lo mester forma parti di e Conseho di Ministro di Reino, basa riba e formula te awor desconoci den e sistema democratico di Reino, cu ta “extra parlamentario”.

Pues e prome trabau pa por goberna Hulandes segun e base cu tin te awor ta, pa dicidi kico e palabranan riba cual e Gobierno Hulandes nobo lo ta basa, ta nifica.

Otro siman por spera cu e partidonan ta bolbe na mesa mientras Gobierno Rutte lo keda encarga cu e gobernacion di e pais te ora otro Gobierno sinta.

Informacionnan di NATO, forma pa e paisnan cu a alcansa e tratado Noord Atlantico despues di Segunda Guera Mundial, awor ta revela cu pa cantidad di pais Rutte ta e candidato di preferencia pero awor tin pais cu kier otro persona como dirigente di NATO.

Esaki pues ta pone un base pa comprende cu e Gobierno actual di Hulanda, dirigi pa Mark Rutte, un rato mas lo no mester comparti Mark Rutte cu NATO, si e organisacion di nacionnan dicidi cu nan kier Rutte como dirigente.

DIARIO ta sigui tur desaroyo pa informa Aruba sigur na e momentonan aki cu Gobierno extra Parlamentario, ta subi mesa. Un Gobierno cu lo no conoce un acuerdo di Gobierno detaya cu ta bisa exactamente kico por spera di e Gobierno pa asina supuestamente, Parlamento forma den su mayoria pa e mes partidonan, lo por tin mas di bisa si tur cos bay manera palabra!