Hulanda na careda mester di CAFT of RAFT den Reino?

The content originally appeared on: Diario

Gobernacion financiero fatal di Rutte a bira fracaso di formacion

*Despues di ocho siman Omtzigt a descubri desastre financiero

*Pa Van der Plas di BBB sala di Parlamento Hulandes ta peligroso 

ORANJESTAD (AAN) — Na momento cu politiconan Hulandes a practica black mail contra Gobierno di Evelyn Wever-Croes cu e exigencia cu Aruba mester wordo pone bou supervision pa medio di un Ley di Reino, DIARIO a opone e accion Hulandes.

Cu Leynan den man, DIARIO a mustra cu no por pone un Gobierno cu a saca un pais for di estado di bancarota, manera Gobierno Wever-Croes a haci na Aruba, bou supervision pasobra Gabinete Mike Eman a hiba Aruba na borde di bancarota.

DIARIO a adverti Aruba for di inicio di 2023, cu e accionnan di Hulanda contra Aruba tabata basa riba e realidad politico di Hulanda, cu a vota di acuerdo cu tur loke DIARIO a splica su votadornan.

Mientras Hulanda tabata exigi Gabinete Evelyn Wever-Croes acepta supervision pa medio di un Ley di Reino, manera DIARIO a mustra, e base di Gobierno di Reino cu ta Gobierno Hulandes, mes tabata den problema serio.

E siman aki e bom a rementa den seno di Parlamento Hulandes y a entrega na Pueblo di Reino Hulandes, e prueba cu DIARIO tabata tin razon den eleccion na Hulanda, a hunga un papel importante contra e actitud politico Hulandes contra Prome Ministro Evelyn Wever-Croes y su Gobierno.

Cu Hulanda ta na careda pa soluciona su situacion financiero, awor ta keda confirma.

Un caos total ta wordo ocasiona den sala di Parlamento, cu ta wordo transforma den un circo politico.

Den esaki DIARIO mester ta honesto y mester mustra cu no ta Geert Wilders ta causa consternacion den Parlamento pero hustamente e Miembronan di Parlamento, cu awor ta uza e argumento cu nan no por traha cu Wilders.

Scandal ta loke ta wordo registra den sala di Parlamento di Hulanda, camimda e berdad grandi cu ta bini dilanti ta, cu Hulanda ta den un situacion financiero desastroso, manera awor tur partido ta admiti.

Kico ta e resultado di e situacion aki di e pais mas grandi den Reino, ta keda un pregunta mientras Parlamento di Hulanda mas y mas ta bira un circo.

Ya e miembro Pieter Omtzigt, cu prome cu eleccion a baila pasodoble y a uza su inseguridad si e ta participa na eleccion of no, pa haya mas atencion.

E no a alcansa loke el a pensa pa motibo di Geert Wilders, un revolucionario cu na e momentonan aki ta asombra cu loke ta pasa den sala di Parlamento Hulandes.

Formacion a keda tranca despues cu Omtzigt a bati retirada pasobra el a tuma nota di e situacion financiero horibel di Hulanda y pa motibo di Wilders.

El a causa hilaridad den mundo politico ya cu despues di ocho siman cu el a negocia pa ta den un Gobierno encabeza pa Wilders, el a yega na e conclusion cu esaki no ta coresponde cu loke el a predica prome cu eleccion.

Ayeranochi mientras tabata wordo confirma cu Omtzigt a bay pa no bolbe, otro bom a rementa ora e lider di e partido nobo BBB, a mustra cu e no por keda den sala di Parlamento pa motibo di su seguridad.

Segun van der Plas, e miembro di partido di Alexandra van Huffelen, de Groot, lo a comberti sala di reunion di Parlamento den un lugar cu ta un amenaza pa su persona.

Un desastre total a keda presenta ayera ora bira conoci cu otro siman e reunionnan di formacionnan lo continua pero cu formador Plasterk lo informa cu e no a logra forma un Gobierno.

Mientrastanto e situacion financiero di Hulanda ta di tal gravedad, cu hasta De Nederlandse Bank tin un conseho con pa cambia e timon di gobernacion financiero di e pais. Un plan pa reduci gastonan a wordo traha dor di Nederlandse Bank como parti di e reorganisacion financiero total cu ta necesario pa e barco Hulandes sigui nabega.

Un situacion sigur fastioso pa Aruba cu no  tin e poder di Statuut pa haci uzo di e leynan cu Hulanda kier a uza contra Aruba, cu supervision financiero.

Aruba, cu bou mando di Prome Ministro Wever-Croes a bira ehempel pa Reino riba maneho financiero, no por papia di un sistema di CAFT of RAFT pa dirigi e politiconan Hulandes, cu ta responsabel pa Gobierno Hulandes pero tambe ta di peso pa Gobierno di Reino!