Huespednan di Bucuti & Tara a uni man pa planta mata riba Dia Mundial di Accion Climatico

Speranza ta planta raiz:

ORANJESTAD (AAN): Dia 24 di October, den conmemoracion di e aña aki su Dia Mundial di Accion Climatico, na Aruba e propiedadnan di Bucuti & Tara Beach Resort a cambia promesa den accion un bes mas cu e lansamento di su programa di Plant a Tree of Love na Bucuti Tara - GMC Nature Preserve, unda a invita e huespednan pa no solamente cultiva e amor cu nan tin pa otro, pero tambe e amor cu nan tin pa Aruba.

   E mainta significante a reuni huespednan di Bucuti & Tara, Sr. y Señora Maccini y Sr. y Señora Ballweg, hunto cu miembronan dedica di resort y cu transportacion di Fofoti Tours cu a generosamente aporta na e iniciativa aki. E evento aki a marca un paso inspirador pa amplia e liderato medio ambiental di Bucuti & Tara for di su resort carbon-neutral te den e curason di Noord, unda e resort su preserva natural ta situa.

   Celebrando accion climatico via conexion: Cada mata ta bira un testimonio bibo, ta crece mas fuerte y mas profundo cu tempo, mescos cu e amor di e parehanan cu ta plant’e. Aparte di su simbolismo romantico, e iniciativa ta duna huespednan un oportunidad significativo pa duna back na Aruba, contribuyendo na restauracion di naturalesa, biodiversidad y resiliencia climatico.

   “Cu nos programa Plant a Tree of Love, nos ta bay mas leu cu solamente reduci emision den e tereno di nos resort,” ta loke Crescenzia Biemans, Managing Director di Bucuti & Tara Beach Resort ta comparti. “E ta refleha nos filosofia cu accion climatico berdadero ta envolvi regeneracion – invitando nos huespednan y comunidad pa tuma parti den restaura y proteha e herencia natural di Aruba. Nos preserva natural, un regalo pa Aruba di Sr. Ewald Biemans, Señora Grete Marie Case, y nos resort, ta ofrece un luga perfecto pa e meta comun di duna back na e isla cu nos ta stima y pa yude florece pa futuro generacion.”

   DIARIO a compronde cu e experiencia Plant a Tree of Love lo amplia den 2026, ofreciendo huespednan un oportunidad duradero pa celebra nan amor mientras nan ta yuda proteha e bunitesa natural di Aruba.

   E evento di platamento di mata a marca un otro logro den e trayecto duradero di liderazgo medio ambiental di Bucuti & Tara. Como e prome y unico hotel den Caribe cu ta certifica carbono-neutral, y tambe ganado di un United Nations Climate Action Award, Bucuti & Tara ta sigui transforma sostenibilidad den e sector turistico.

   Na e centro di e mision aki ta e Bucuti & Tara – GMC Nature Preserve, un santuario pa biodiversidad nativo, educacion y investigacion di 130.000 m2 den e area di Noord. Hunto cu e NGO Ban Lanta y Planta, Bucuti & Tara ta reforestando e preserva natural cu mas di 1.200 matanan y plantanan nativo, cada un yudando pa restaura e balans natural di Aruba. Den colaboracion cu Universidad di Aruba, investigacion continuo ta worde haci pa compronde con especienan nativo ta capta y ta warda carbono, cual ta duna informacion valioso pa desaroya strategia climatico di largo plaso y resforza e papel di e preserva como un sink di carbono vital pa tanto comunidad como e resort.

   E preserva no solamente ta restaura e ecosistema nativo den e area, sino tambe ta forma un rol esencial den absorbe carbono mientras Bucuti & Tara ta avansando pa logra su certificacion di Net Zero pa Scope 1 y 2.