Hues a ordena pa paga dos cuidador di preso y cu nan mester bolbe traha back na KIA

admin

A bin buelta di 180 % den decision di Gobierno

Cuidador Preso bay bek KIAORANJESTAD (AAN): Hues di Corte den Promer Instancia a tuma un decision cu ta 180 % contra na loke Gobierno a dicidi pa dos di e grupo di cuidador di preso na KIA cu a worde kita for di trabao door cu nan a bati un preso cu a dal y kibra nanishi di un colega cuidador di preso.

   Despues cu Gobierno a tuma e decision cu ta tuma medida diciplinario di retira e grupo aki for di trabao, G.M. y R.d.l.C. a dicidi di cuminsa un caso cu asistencia di hurista mr. Duijneveld trahando cu James Martin & Associates.

Mr. Duijneveld a defende e dos cuidadornan di preso nan punto di bista y Hues ta haya cu nan mester haya pago desde Juni 2016 y cu nan mester regresa trabao te ora cu tin un decision den e caso mas profundo.

    KITA CUIDADORNAN DI PRESO FOR TRABAO:

    E caso aki a haya hopi atencion di DIARIO pa informa comunidad kico realmente ta pasando den KIA. Hues di Corte den Promer Instancia a sigui e ponencia di Fiscal, kende a pidi castigo di di 2 aña di prison y 5 aña cu nan no por traha mas pa Gobierno. Apesar di e señalamento di mr. Duijneveld cu a mustra e situacion hopi serio cu e cuidadornan di preso ta pasando aden den KIA, Hues ta considera loke e grupo aki a haci ta un forma di tortura.

Henter e grupo a apela e sentencia y den Corte Superior, abogadonan a bolbe mustra riba e situacion explosivo reinante na KIA. Hof si a tene debido cuenta cu esaki y a destrui e decision di Corte den Promer Instancia completamente. Hof a condena e trahadornan na trabao comunitario y cu nan mester reanuda trabao.

Apesar di e decision di Corte Superior, Gobierno a dicidi di tuma medida diciplinario caminda a kita 4 di biaha for di trabao. Despues na Maart 2016, a kita G.M. y R.d.l.C. Nan a bay cerca nan hurista mr. Duijneveld kende a bringa pa nan y a resulta.

Den combersacion cu mr. Duijneveld, el a duna di conoce cu e ta hopi contento pa su clientenan cu awor lo haya nan salario y ta bay traha back te ora tin un decision den e caso mas profundo. Mr. Duijneveld tin confianza cu husticia lo prevalece den e caso mas profundo tambe.

    EVALUACION DI HUES:

   Matutino DIARIO por a compronde cu Hues a bati riba dede di Gobierno pa e forma cu casi dos aña despues di e incidente, ta bin cu e decision di medida diciplinario di retiro. Tur e tempo ey e dos cuidadornan di preso menciona, tabata traha normal.

Hues a bari for di mesa e ponencia di Gobierno cu no por a bin na un decision mas promer pasobra Gobierno no tabata dispone di e informacionnan necesario.

Hues a mustra cu ta deber di Gobierno pa percura cu e aparato gubernamental ta asina organiza cu Gobierno ta haya na tempo tur e informacionnan cu e tin mester pa por tuma decisionnan corecto.

Hues tambe ta mustra cu e dos cuidadornan di preso tin interes pa bolbe traha. Ta un secreto publico cu mas cu e mitar di e salario di e cuidadornan di preso ta bin di tur e tempo extra cu nan ta trahando y otro trabaonan.

   DECISION:

   Hues su decision ta cu e ta aproba e peticion di e cuidadornan di preso pa tuma un decision pendiente e resultado di e caso mas profundo.

Hues a ordena Gobierno pa paga e dos cuidadornan di preso nan salario entrante luna di Juni 2016, te ora tin un decision definitivo den e caso mas profundo.

Hues tambe ta ordena pa e dos cuidadornan di preso bolbe bay traha, te ora cu tin un decision definitivo den e caso mas profundo.

Esaki ta nifica cu e dos cuidadornan di preso aki ta bay traha back pendiente resultado definitivo di e caso mas profundo. Sinembargo, mirando e forma con Hues ta mira e caso, e chens ta grandi cu den e caso mas profundo, e decision di retiro lo worde kita for di mesa.

Next Post

Tanten cu no sinta cu Valero no por sigui cu ningun otro negociacion

Parlamentario Rene Herde ta lamenta e comentario di fraccion di MEP ORANJESTAD (AAN) E reunion cu tabatin den parlamento riba CITGO tabata un reunion informativo y no publico. Parlamento Rene Herde ta duna di conoce cu e reunion informativo aki ta pa duna parlamento informacion con e negociacion nan ta […]