Hopi mayor reaccionando positivamente riba e accion di Polis pa colecta arma di candela

The content originally appeared on: Diario

Tin casonan serio di depresion den hobennan na Aruba

ORANJESTAD (AAN): E matansa cu a sosode recientemente na Merca a laga hopi dolor. Hopi famia na e momentonan aki ta den un tristesa inimaginabel despues di e tiramento cu a tuma lugar na un scol na Texas caminda 19 mucha a fayece.

                E problematica di posesion di arma na Merca ta uno cu mester wordo atende sigur urgentemente ya cu e situacion a bay for di man.

                Na Aruba, tin hopi arma tambe ariba caya. No ta conoci den man di ken e a armanan aki ta ni ken ta e doño. Locual si por bisa ta cu hopi miembro di gangnan na Aruba ta cana arma, ya sea cu arma di candela of obhetonan skerpi.

                E informacion cu Cuerpo di Polis ta bay inicia pronto un accion pa colecta arma di candela a cay den bon tera cerca hopi mayor cu ta preocupa tambe aki na Aruba.

                Manera DIARIO a anuncia caba diaranson, Ministerio Publico y Cuerpo Policial Aruba (KPA) tin intencion di tene un accion di colecta arma di candela pa bringa posesion di arma di candela ilegal.

                Durante e periodo aki personanan por entrega nan arma di candela na polis anonimamente y sin castigo.

   E intencion di e accion aki lo no ta pa resolve caso, sino pa kita armanan di candela for di caya.

                E ultimo accion di colecta arma di candela anonimamente y sin castigo a tuma lugar na 2009. Kiermen, basta tempo a pasa caba cu a realisa un accion similar.

                Awor, ta importante pa cuminsa conscientisa e muchanan y e hobennan na e scolnan riba e peliger c’un arma di candela por nifica.

                Awendia, tin hopi mucha y mayoria di nan hoben, cu ta biba pega basta ora di e asina yama ‘video games’. Hopi di e weganan online aki ta contene hopi violencia, matamento, uzo di arma, etc.

                Esaki ta algo cu ya caba a wordo adverti door di entre otro Fundacion Anti Droga Aruba (FADA).

                Sinembargo, mester para keto un rato no solamente na e problematica aki cerca e hobennan cu adiccion na e ‘videogames’, pero tambe na campañanan di informacion y concientisacion riba loke a sosode na Merca y pa e hubentud por tin miho conocimento riba kico por haci den caso cu algo parecido sosode na nan scol, si un mucha of otro hende aparece den nan campus di scol c’un arma di candela.

                E salud mental di e muchanan tambe ta importante. Locual a sosode na Texas a laga e muchanan sobreviviente marca pa bida largo. Nan no lo ta e mesun mucha mas y nan lo carga pa resto di nan bida e secuelanan di locual nan a pasa aden.

                Na mesun momento, e parti di salud mental tambe mester keda un prioridad den tur momento. Awendia, y tin estadisticanan di esaki den tur scol na Aruba, cu hopi mucha ta presente na scol cu casonan severo di depresion. Ya sea pa motibo di problemanan familiar, bullying, acoso, abuso sexual, etc.

                Esaki ta un realidad aki na Aruba y pesey, mester tuma bon nota di locual ta pasando cerca e hobennan y cual ta e ‘red flags’ cu nan ta presenta pa asina por cuminsa actua na tempo prome cu ta laat.

                DIARIO a haya informacion for di expertonan cu a duna di conoce cu despues di loke a pasa na Merca, a wordo bisa cu ta bay implementa ‘mental health first aid’, kiermen, intervencion den crisis den salud mental obligatorio pa tur docente y personal di e scolnan.
                Parce cu na Aruba, ya caba tin profesionalnan cu a sigui e curso aki recientemente. Te hasta kier implementa esaki na nivel di institutonan di educacion mas avansa y no solamente na scolnan basico y secundario.

                Locual mester haci na Aruba ta pone mas profesional den salud mental. Tin hopi cu ya caba ta haciendo un specialisacion, pero na scol, e docentenan mester haya un specialisacion, un curso, di intervencion den crisis den salud mental. Mescos cu na Merca, mester implementa esaki na Aruba.