Hopi hende ta desea pa e obra teatral ‘Greetings from Aruba’ wordo ripiti

The content originally appeared on: Diario

Feria Cultural na Colegio Nigel Matthew a encanta e publico:

ORANJESTAD (AAN) Diabierna anochi un publico grandi a acudi na Feria Cultural di Colegio Nivel Matthew.  Tabatin animacion di Robert Maduro y Azucar, Rincon Boyzz, Massive Brassband, cantamento di Galloway, Tipico Pegasaya, Queen Ivy, King Carl, y mas.

   Manera ta conoci, Ferdinand Franca, Docente di CKV-drama hunto cu su coleganan Juffrouw Zayra y Juffrouw Bianca, a prepara un obra teatral multidisciplinario yama ‘Greetings from Aruba’, cu a wordo presenta Diabierna cu a pasa.

E obra a forma parti di e Feria Cultural na Colegio Nigel Matthew, cu a bira un exito rotundo y cual meta tabata pa recauda fondo pa e alumnonan di Klas 4, haci un biahe na Ontario, Canada.

E obra aki a desplega asina tanto talento, cu hopi hende a keda encanta, a gab’e asina hopi, cu varios hende ta desea pa e obra wordo ripiti, pa wak’e atrobe pero tambe pa esnan cu no a logra wak pa nan mes, cuanto talento e hobennan di San Nicolas tin.

 “Greetings from Aruba”, segun Ferdinand Franca a expresa “ta pone nos pensa y refleha kico ta loke ta pone nos orguyoso di Aruba”.

“Ta trata aki di un obra original, cu ta refleha tur e fiestanan cultural y tur loke ta haci nos orguyoso di biba y a crece na Aruba”, Ferdinand Franca a reitera.

Tambe e publico a goza di gruponan di baile invita manera Step by Step, Grupo Dabaruida, Saniflow, cu ta un grupo nobo tambe tremendo.

   Ohala por conta cu e sponsornan cu a colabora pa e presentacion di Diabierna y cu bolbe trece e Obra sublime “Greetings from Aruba” lo bira un realidad.