Hopi compania ta ofreciendo djis salario minimo

The content originally appeared on: Diario

Director di DPL:

*Localnan no ta mirando salarionan atractivo 

ORANJESTAD (AAN):  Director di Departamento di Progreso Laboral (DPL), Ronny Irausquin a laga sa cu pa loke ta trabao, tin personanan cu a bay solicita y nan a bisa cu nan no ta bay traha pa e salario ey. Ta papiando akinan di hendenan cu experiencia, cu a perde trabao tempo di Covid y nan a acerca DPL pa busca un trabao.

            Segun Irausquin, berdad e salario ta abao. Hopi compania ta ofrece salario minimo y no ta pone un salario atractivo pa un local, por ehempel, yega y solicita na un manera mas facil riba dje. El a bisa cu por ta un salario minimo pa un koki, un cook helper, no ta bay haya un hende local asina facil pa nan.

            A pesar cu e trahadonan por gana tips acerca, DPL no ta haya esaki den nan vakature. E companianan ta djis pone cu e trahado ta haya un premie. DPL no ta bay asina leu pa haya sa kico ta e premie of e salario den su totalidad, Ronny Irausquin a indica.

            Ora cu Departamento di Labor haci un control, nan ta controla esey, a agrega. DPL ta wak cu e ta wordo paga riba e salario minimo.

            Irausquin a indica tambe cu nan no a papia riba esaki cu e gremio di horeca, por ehempel. E ta kere cu lo ta bon pa nan sinta den nan seno y wak kico ta e beneficionan cu toch por atrae e localnan pa bay traha cu nan, a remarca.