Homber peligroso deteni durante razzia y a haya arma y monton di municion na Bushiri

The content originally appeared on: Diario

Bon trabao investigativo di Atraco Team

ORANJESTAD (AAN): For di e momento cu Polis a gara recien un hoben den un Suzuki Swift cora den area di Eagle, cerca di Bushiri, y tambe a haya den e auto varios atributo cu normalmente atracadornan ta usa, manera capuchon pa tapa cara, y tambe un arma di candela, a sigui investiga y a gara recien un otro persona mas cu arma den su poder.

   Diabierna mainta a bin haya mas bon noticia!  Despues di a haya luz berde di Ministerio Publico, funcionarionan hudicial di Atraco Team un biaha mas a haci un detencion na Bushiri y a haci esaki den oranan trempan di mainta.

   Ta asina cu den oranan tempran di mainta Atraco Team hunto cu Team di Aresto a tene un razzia na un cas na Bushiri.  Como cu a pensa cu lo por topa cu personanan hopi peligroso, a bay tambe cu oficialnan di Flex Team di Polis, y unidadnan K-9.

   Durante e razzia trempan aki, a sorprende y detene e sospechoso cu nan ta buscando, esta e homber di inicial L.M.A.M.O.

   Durante e entrada hudicial a encontra un arma di candela y cantidad considerabel di municion.

   Sigur esaki tabata un bon trabao di Atraco Team trahando incansabelmente pa asina soluciona e casonan y como tambe kita e arma di candela for di caya. 

   Cuerpo Policial ta haci un suplica pa esnan cu sa algo of mira algo por yama e tiplijn di polis cu ta 111-41, y corda cu bo ta keda anonimo.