Homber cu problema mental a causa panico na Biblioteca Nacional

admin


ORANJESTAD(AAN): — Diabierna mainta trahadornan di Biblioteca Nacional den George Madurostraat tabata preocupa y hasta spanta, pa motibo cu un persona a drenta biblioteca. E tabata bisti no mucho bon y ademas e tabata actua masha straño mes.

Mesora nan a tuma contacto cu polis y a manda un unidad y e polis di bario tabata esun cu a yega na e sitio. Nan a drenta Biblioteca Nacional y mesora e trahadornan para den un grupo na un area a mustra cu dede unda e persona aki ta.

Polis a cuminsa cana mey mey di e reki di e bukinan y finalmente a bin topa cu e persona cu ta conoci di polis, di fam Geerman. Polis a reconoce mesora.

Ta trata aki di un persona cu ta sufri mentalmente.

Esey ta e motibo tambe cu e empleadonan a spanta y nan no tabata sa kico ta su intencion y pesey a bati alarma.

Na momento cu el a mira polis, polis a cuminsa papia cun’e y el a cuminsa papia masha hopi cos bruha, cu e ta haciendo un estudio, mester di buki, etc. Pero ya caba polis conoce su storianan, cu no ta klop y ta cosnan cu e ta papia. Totalmente un disparate.

Polis a pidi’e pa bandona e sitio y bis’e pa bay warda, pasobra nan tin su paspoort warda eynan.

Ora cu nan tabata canando bay pafo, hasta el a duna indicacion cu pafo tin algo cu el a laga atras. A bin resulta cu tabata un boa morto grandi e tabata tin lora den un camisa, cual tambe segun e, ta un cos cu cacho a mata y e sa ta ken a mat’e, etc. Ta un cantidad di storia bruha e persona aki tabata splica na polis.

E persona aki tin un problema mental hopi pisa. Danki Dios cu e no ta agresivo y despues cu polis a mustr’e cu e tin cu tira e boa aki afo, el a tir’e y a cuminsa cana bay warda unda cu polis a bis’e cu nan lo top’e asina entregu’e su paspoort cu nan tin di dje warda.

E empleadonan di biblioteca a keda trankil, despues cu polis a saca e persona aki for di Biblioteca Nacional na Playa.

 

 

Next Post

Placa di nummerplaat ta bay den un “centrale pot” di gobierno

Segun Minister Otmar Oduber, cu e fondo aki por drenta tur caretera na Aruba ORANJESTAD  (AAN):  Tocante e fondonan cu gobierno ta ricibi di nummerplaat di belasting, originalmente a wordo crea pa mantencion di camindanan na Aruba. Sr. Otmar Oduber, minister di Infrastructura ta elabora ariba esaki. Tradicion ultimo añanan […]