Homber condena na 18 luna di prison pa ta core cu amigo cu arma di candela den auto

The content originally appeared on: Diario

Hues ta hay’e complice

ORANJESTAD (AAN): Diabierna mainta e homber A.F. a presenta dilanti Hues pa scucha su sentencia. Fiscal a exigi 24 luna di prison pa A.F. como complice di arma di candela. Fiscal a bisa cu A.F. recien a sali liber di un condena relaciona cu arma. Fiscal a exigi pa detene A.F. di biaha den Corte. Hues a bisa cu e lo bay studia e caso y a laga A.F. liber, pendiente su decision.

   No mucho tempo despues di e caso, Polis a detene A.F. durante un investigacion riba un grupo. Desde e dia ey, el a keda sera y ayera el a scucha Hues duna orden pa su detencion di biaha.

   Fiscal: Algun siman pasa, tratamento di e caso a tuma lugar caminda tabatin 3 sospechoso y A.F. tabata un di nan. Fiscal a bisa Hues cu asistencia di Polis a worde pidi na pomp di gasoline den caya grandi na Playa pa hendenan cu tabata haci fastioso. Polis a bay y tabata vigila riba un distancia. Na dado momento e agentenan a mira S.M. purba sconde algo den e auto. Polis a para e auto y a mira S.M. a bolbe purba sconde algo.

   A haci investigacion den e auto y a haya droga y arma di candela 9 mm. Fiscal a bisa cu S.M. tabata nenga cu e arma ta di dje y a culpa J.M. y A.F. Fiscal a mustra cu S.M. a bisa Polis cu e sa warda e arma pa A.F. Despues S.M. ta bisa cu e arma ta di un persona cu ta peligroso. Dilanti Hues Comisario, el a bisa cu e arma ta di dje. S.M. a admiti cu e droganan ta di dje. Fiscal ta haya legalmente proba cu S.M. tabatin droga y arma. Fiscal ta haya cu no por bisa cu J.M. tabata sa di e arma y no por prueba esaki. Esey ta trece cun’e cu el a pidi Hues pa declara J.M. liber di posesion di arma.

   Pa loke ta A.F., Fiscal a bisa cu A.F. a keda para riba cu e no sa di arma. Sinembargo Fiscal ta haya cu A.F. tabata sa di e arma. E arma a worde haya den e auto di A.F. Fiscal a bisa cu S.M. mes a declara cu el a warda e arma diferente biaha pa A.F. S.M. a bisa cu e ta soldat di A.F. Fiscal a laga pasa den Corte, video cu a haya den cellular di S.M. caminda na Augustus y September 2023, por mira S.M. cu e arma den auto di A.F. S.M. tabata sinta patras ta filma cu e arma. Fiscal a bisa Hues cu A.F. tabata sa cu S.M. tabata arma.

   Tambe Fiscal a bisa cu a haya combersacion di whatsapp caminda A.F. ta pidi pa bala. Fiscal ta haya cu A.F. y S.M. ta culpable di posecion di arma. Ta asina cu e mesun dia S.M. a worde condena na castigo di prison pa e arma y droga. Fiscal a exigi 24 luna di prison pa A.F. y a exigi pa A.F., cu no tabata deteni, worde deteni di biaha den Corte y hiba KIA. Hues a bisa cu e ta bay studia e caso y no a tuma decision riba detencion di A.F.

   Sentencia: Diabierna mainta Hues a bisa cu e ta haya A.F. culpable di posecion di arma. Hues ta haya cu A.F. tabata hunto cu S.M. entre 13 Augustus 2023 y September 2023 den auto di A.F. cu e arma. Hues a bisa cu ariba e video por mira cu A.F. tabata stuur auto mientras cu S.M. tabata sinta patras den e auto ta filma cu e arma. Hues a bisa cu S.M. a declara na Polis cu e ta un soldat di A.F. y ta cana cu arma. Hues ta haya A.F. ta complice di posecion di arma. Hues a mustra riba e peliger di arma di candela.

   Pa cu e castigo, Hues a tene cuenta cu A.F. ya a worde condena pa un caso di arma y a haci e delito aki durante su tempo di prueba. Hues a condena A.F. na 18 luna di prison y a duna orden di su detencion di biaha. Awor A.F. mester sinta e 18 luna y ta pendiente pa e otro caso cu el a worde deteni recien.