Holor di gas na piso 4 a causa alarma den Hospital

The content originally appeared on: Diario

*team di calamidad di Hospital (HVT) a bay den accion mesora — *HOH ta aclarea cu na ningun momento mester a evacua pashent


ORANJESTAD (AAN): Segun informacionnan di Communications Manager di Hospital, señora Charlaine Huntington, diaranzon pa 7.15 di anochi, a constata un holor di gas na piso 4 di e banda ya renoba di Hospital. Di biaha a bati alarma y team di calamidad di Hospital (HVT) a bay den accion.

Polis y Brandweer tambe a yega Hospital di biaha pa sigura cu tur cos ta bou di control. HOH kier aclarea cu na ningun momento a evacua pashent mirando cu a tuma accion di biaha y nan siguridad no tabata den peliger. Brandweer a hasi e trabounan di control pa sigura cu no tin ningun lekkage.

Señora Huntington a indica cu actualmente tin trabounan di construccion andando na Hospital y esaki por a ocasiona e holor di gas. HOH kier sigura cu tur cos ta bou di control y e pashentnan y empleadonan ta safe.  Nan lo sigui di biaha cu un evaluacion di e sucedido y lo tuma accion si ta, y unda ta necesario. Hospital ta manda un palabra di gradicimento pa Team di Calamidad di HOH (HVT) y nan coleganan cu a actua debidamente. Y tambe un danki grandi pa team di Brandweer y Polis cu a acudi manera a bati alarma.