Hof a baha castigo pa coach di futbol di Brazil Jrs. Kende a abusa di mucha homber

The content originally appeared on: Diario

Hof di a kita e prohibicion pa e sigui traha

ORANJESTAD (AAN): Diamars merdia Hof di Corte Superior a dicta sentencia den e apelacion di e ex-coach di futbol di Brazil Jrs., esta e homber P. di 35 aña kende ta biba na Tarabana, contra su sentencia pa a abusa di un mucha homber di 15 aña.

   Ta asina cu Hof ta haya P. culpabel pero no ta haya cu e mester worde prohibi pa sigui traha como “leerplicht ambtenaar”. Hof a baha e castigo di 4 aña na 3 aña di prison.

   Apela sentencia: Ta asina cu P. a apela e sentencia di 4 Februari 2022, caminda el a worde haya culpabel di a abusa di un mucha homber di 15 aña.

Fiscal durante tratamento di e caso, no ta haya cu P. por sigui haci e trabao di “leerplicht ambtenaar”.

   Fiscal ta haya cu P. no a responsabilisa pa loke el a haci aunke e tin derecho di nenga. El a exigi 4 aña di prison di cual 6 luna ta condicional cu un tempo di prueba di 3 aña. Esaki cu e condicion cu P. ta cay bou guia di Reclasering.

   Tambe Fiscal a exigi pa prohibi P. pa haci su trabao te caminda ley ta permiti.

Hues den su sentencia a bisa cu tin indicacion cu P. via social media ta persigui muchanan pa abusa di nan.

   A haya den smartphone di P. potret di mucha menor di edad y e mucha a bisa Polis cu P. ta un maniac. Tin un otro mucha cu a bisa cu P. a ofrece placa pa abusa di dje.

   Na opinion di Hues, mirando cu esakinan ta cuadra cu loke e victima a pasa aden, e ta haya cu tin suficiente prueba di sosten. Tambe Hues a mustra cu tin declaracion di e wela cu ta biba na e cas, declaracion di e mucha y imagennan di video di seguridad na e cas cu ta mustra culpabilidad di P.

   Hues a confirma e exigencia di Fiscal esta a condena P. na 4 aña di prison di cual 6 luna ta condicional cu un tempo di prueba di 2 aña. Esaki bou guia di Reclasering. Hues no a menciona nada cu ta prohibi P. di sigui haci su trabao.

   Sentencia di Hof: Via video conference, Diamars merdia, un Hues di Corte di Husticia a lesa e sentencia pa e acusado cu tabata den un oficina den KIA.

Hof a mustra cu P. a apela e sentencia y PG a pidi pa confirma e castigo y e prohibicion pa P. traha como “leerplicht ambtenaar”.

   Hof ta haya P. culpabel pero no ta haya cu mester prohibi P. di sigui traha como “leerplicht ambtenaar”. Hof a reduci e castigo di 4 aña na 3 aña di prison di cual 1 aña ta condicional cu 3 aña di prueba y bao guia di Reclasering.