Hit & Run fatal na Playa a wordo ocasiona pa chauffeur masculino di 24 aña

The content originally appeared on: Diario

El a wordo deteni Diadomingo anochi

ORANJESTAD (AAN): E caso di accident fatal di Diadomingo mainta trempan riba Linear Park na Playa Departamento di trafico a sigui cu e investigacion di e accidente fatal cu a tuma lugar riba diadomingo mainta trempan riba Linear Park, net otro banda di compleho di oficina di Lloyd G. Smith Boulevard 12.

    Un auto of vehiculo a baha di caminda, dal e peaton Ana Rosa Montaño Martinez naci dia 16 di Februari 1962 (60 aña) na Republica Dominicana.  E tabata cana y jog tur mainta trempan riba Linear Park pa mantene su condicion fisico.

   El a wordo gedal, y posiblemente benta abao net dilanti un palo di kwihi, y a keda mortalmente herida eybao.  Cu urgencia el a wordo transporta pa Hospital, unda algun minuut despues el a fayece.  Su famia a keda inconsolable y mesora a haci suplica na autoridad pa investiga esaki.

   Ta parce cu Specialista di Trafico a haci un trabao diligente, posiblemente haciendo uso di Security Video Cameras y tip di testigo, pa asina enfoca nan mes riba un persona cu ta biba den area di Ponton.

   Danki na e investigacion, e mesun anochi ey autoridad a haci un detencion relampago.  Vocero di Polis a djis identifica e chauffeur sospechoso, mustrando cu su fam ta di inicial G., y cu e tin 24 aña di edad.    Segun vocero di Polis, e chauffeur aki ta detene pa Articulo 4 inciso 2, y tambe Articulo 40 inciso 1-A y inciso 2-A di Ley di Trafico.

   E investigacion pa e caso lamentabel aki ta den pleno desaroyo pa departamento di trafico.  No a suministra tampoco nada di informacion si acaso a confisca e vehiculo (pickup of truck), of si acaso ta un auto e ta.

   E potret aki ta uno di archivo suministra pa Cuerpo Policial.