Haya sa mas di e Ley di Retiro y Motibo Urgente valido na Aruba

The content originally appeared on: Diario

ORANJESTAD (AAN): Ley di retiro t’ey pa proteha e trahado contra un terminacion di relacion di trabao inhusto.


Den general, e relacion di trabao por worde termina door di terminacion di un contract, door di un acuerdo verbal entre e dunado di trabao y e trahado, door di un banda di e partidonan tumando na cuenta un periodo di pre-aviso di un termino di pago di salario (por ehempel, luna, quincena, etc.) segun ley laboral.

   Mester tene na cuenta cu un dunado di trabao tin e obligacion di haci un peticion di retiro na Departamento di Labor prome cu e kita un trahado for di trabao. E formulario pa e peticion di retiro ta obtenibel na oficina di Departamento di Labor.  Aunke e trahado bay di acuerdo cu su retiro, ta consehabel pa e dunado di trabao haci e peticion ya pa mayan no tin conflicto di mal interpretacion di combersacionnan.

  Un dunado di trabao por kita un trahado sin pre-aviso ora tin un motibo urgente (“dringende reden”) segun e Codigo Civil di Aruba. Esakinan ta:

  (*) Ora e trahado duna informacion incorecto ora cu a sera e acuerdo di trabao sea den documentacion falso of informacion falso den con su trabao anterior a worde termina

  (*) Ora su capacidad of abilidad ta seriamente bou nivel pa e trabao cu el a worde tuma pa haci

  (*) Ora cu e, aunke a worde taha, ta somete su mes na buracheria y comportacion abominabel

  (*) Ora e trahado ta culpabel di ladronicia, malversa placa of fraude of cualke otro delito pa cua e dunado di trabao no tin confianza mas

  (*) Ora e agredi, gravemente insulta of seriamente menaza e dunado di trabao, su famia of personanan cu e ta biba cu ne, of otro coleganan di trabao.

  (*) Ora e trahado tenta of purba tenta e dunado di trabao, su famia of personanan cu e ta biba cu ne, of otro coleganan pa haci actonan contra ley,

  (*) Ora e intencionalmente of despues di a worde taha, ta causa daño na propiedad di e dunado di trabao of somete otronan den peliger

  (*) Ora e intencionalmente of despues di a worde taha, ta somete su mes of otronan den peliger pa su comportacion irresponsabel

  (*) Ora e revela informacion particular di e cas of negoshi di e dunado di trabao cu mester keda secreto

  (*) Ora e den un manera obstina nenga di cumpli cu un tarea rasonabel di trabao cu a worde pidi pa of den nomber di e dunado di trabao

  (*) Ora e ta para ariba di neglisha su obligacionnan stipula den su contract di trabao.

  (*) Ora e iresponsabelmente no ta den estado haci su trabao.

   Un trahado por kita di trabao sin pre-aviso segun e siguiente motibonan urgente:

  (*) Ora e dunado di trabao agredi, gravemente insulta of seriamente menaza e trahado of permiti tratonan similar riba e trahado door di un persona cu e ta biba cu ne of otro subordinadonan.

  (*) Ora e dunado di trabao tenta of purba tenta e trahado, su famia of personanan cu e ta biba cu ne, of permiti esaki door di un persona cu e ta biba cu ne of otro subordinadonan

  (*) Ora e no cumpli cu pago di salario riba e dia stipula

  (*) Ora e dunado di trabao no zorg pa vivienda y cuminda adecuado den caso cu esaki ta aplicabel

  (*) Ora e dunado di trabao no ta duna trabao suficiente, manera a worde cumbini, na e trahado cu su salario ta depende riba e cantidad di trabao

  (*) Ora e dunado di trabao no ta pone desponibel e material necesario pa e trahado cumpli cu su trabao, manera a worde cumbini, ora e trahado su salario ta depende riba e cantidad di trabao

  (*) Ora e ta para ariba di neglisha su obligacionnan stipula den su contract di trabao.

  (*) Ora cu e dunado di trabao, sin cu e caracter di e trabao ta prescribi, y no obstante cu e trahado nenga di hacie, ta bisa e trahado pa e eherse trabao serca un otro dunado di trabao.

  (*) Ora cu e prolongacion di e relacion di trabao ta mara na peliger di bida, salud, moralidad of bon reputacion, cu no tabata previsto ora di a sera a combenio.

  (*) Ora e trahado pa motibo di malesa of otro rason for di su alcanse no ta den estado pa haci e trabao.

  Pa un terminacion di e relacion di trabao keda uno amicabel y profesional, semper mester haci esaki cu consideracion y comunicacion habri. Tur hende ta busca un miho bida y cambiando trabao pa uno cu ta paga mas y cu miho beneficio ta un opcion. Mescos, un dunado di trabao tambe lo prefera di tin den su servicio un trahado cu ta produci miho y mas eficiente cu locual e tin. Pa circumstancianan normal, tuma den consideracion di no laga Bo dunado di trabao man na cabes den por ehemplel un periodo cu hopi trabao. Harmonia na trabao ta produci miho trahadonan, laga nos tur contribui na esaki.